އިނގިރޭސި އެފްއޭ ކަޕުގައި ރޭ މެންޗެސްޓާ ސިޓީ އަދި ވެސްޓްހެމް ޔުނައިޓެޑް ބައްދަލުކުރި މެޗު ފަސޭހަކަމާއެކު 0-5 އިން ސިޓީ މެޗު ކާމިޔާބުކޮށްފިއެވެ.
ވެސްޓް ހެމްގެ ދަނޑު، ލަންޑަން ސްޓޭޑިއަމްގައި ކުޅުނު މިމެޗުގެ ފުރަތަމަ 30 މިނެޓުތެރޭގައި ސިޓީއަށް ވަނީ ޕެނަލްޓީއެއް ލިބިފައެވެ. ޕެނަލްޓީ ޖަހައި މެޗުގެ ލީޑު ނަގާފައިވަނީ ޔާޔާ ޓޯރޭއެވެ.
ކައިރި ކައިރީގައި އިތުރު ދެގޯލު ސިޓީގެ ފަރާތުން ފެނިގެން ގޮސްފައިވާއިރު މެޗުގެ ދެވަނަ ގޯލަކީ ވެސްޓް ހެމްގެ ނޯޓްވެއިޓް އަތުން ބައިކޮޅަށް ވަން ގޯލެކެވެ. 41 ވަނަ މިނެޓުގައި މިގޯލު ވެސްޓް ހެމް ކޮޅަށް ވަދެފައިވާއިރު 43 ވަނަ މިނެޓުގައި ޑޭވިޑް ސިލްވާ ވަނީ މެޗުގެ ނަތީޖާ 0-3 އަށް ފުޅާކޮށްފައެވެ.
މެޗުގެ ހަތަރުވަނަ ގޯލު 50 މިނެޓުގައި ޖަހާފައިވަނީ ސާޖިއޯ އެގުއޭރޯއެވެ. ސަސްޕެންޝަނުގައި ހުރުމަށްފަހު މިއީ އަގުއޭރޯ އެނބުރި އައިސް ޖެހި ފުރަތަމަ ގޯލެވެ.
މެޗުގެ ފަހު ގޯލު 84 ވަނަ މިނެޓުގައި ޖަހާފައިވަނީ ޑިފެންޑަރު ޖޯން ސްޓޯންސްއެވެ. ޑިފެންޑަރުގެ ގޯލަށް ކޯޗު ގާޑިއޯލާ ވަނީ ތައުރީފު ކޮށްފައެވެ.