އައިފޯން އުފައްދާ އެޕަލް ކުންފުނީގެ ސީއީއޯ ޓިމް ކުކްގެ އާމްދަނީ ވަނީ 2016 ވަނަ އަހަރު ދަށަށް ގޮސްފައެވެ. އެހެންނަމަވެސް ހިއްސާތައް ވިއްކައިގެން ލިބޭ ފައިދާއިން އޭނާއަށް ލިބުނު އާމްދަނީ ވަނީ އިތުރު ވެފައެވެ.
އެގޮތުން 2016 ވަނަ އަހަރު މުސާރައާއި ބޯނަސް ހިމެނޭ ގޮތަށް ޓިމް ކުކްއަށް ލިބިފައިވަނީ 8.75 މިލިއަން ޑޮލަރެވެ. އެއީ 2015 ވަނަ އަހަރު ލިބުނު 10.3 މިލިއަން ޑޮލަރަށްވުރެ ވަރަށް ބޮޑުތަން ކުޑަ އަދަދެކެވެ.
އެޕަލްގެ ހުރިހާ އެގްޒެކެޓިވުންގެވެސް މުސާރައާއި ބޯނަސް ވަނީ މިދިޔަ އަހަރު އެކުންފުނީގެ ވިޔަފާރި ދަށްވުމުގެ ސަބަބުން ކުޑަވެފައެވެ.
އެހެންނަމަވެސް، ޓިމް ކުކްއަށް ވަނީ އެޕަލްގެ ހިއްސާތައް ވިއްކައިގެން ލިބުނު ފައިދާއިން 136 މިލިއަން ޑޮލަރު ލިބިފައެވެ.
މިހުރިހާ މަޢުލޫމާތެއް ވަނީ އެމެރިކާގެ ފައިނޭންޝަލް ރެގިއުލޭޓަރު ކަމަށްވާ ސެކިއުރިޓީސް އެންޑް އެކްސްޗޭންޖް ކޮމިޝަނަށް ހުށައެޅުނު ފައިލެއްގައެވެ.
ޓިމް ކުކް އެޕަލްގެ ސީއީއޯގެ މަޤާމާއި ހަވާލުވީ 2011 ވަނަ އަހަރުގެ އޮގަސްޓް މަހުއެވެ.
އޭނާގެ ކޮންޓްރެކްޓްގައި ވާގޮތުން، އޭނާއަށް ވަނީ ކުންފުނީގެ ބައެއް ހިއްސާތައް ދީފައެވެ. އެހިއްސާތައް އެހެން ފަރާތަކަށް ދެވޭނީ ނުވަތަ ވިއްކޭނީވެސް އެކޮންޓްރެކްޓްގައި ބުނެފައިވާގޮތުން ކަނޑައެޅިފައިވާ ވަކި ގަޑިތަކެއްގައެވެ. އެހިއްސާތަކުގެ ސަބަބުން ޓިމް ކުކްގެ ޖުމްލަ އާމްދަނީ ވަނީ 145 މިލިއަން ޑޮލަރަށް އަރާފައެވެ.