ޒުވާން ދެ ތަރިން ކަމަށްވާ ސުޝާންތު ރާޖްޕުޓް އާއި ޖެކޮލިން ފެނާންޑޭޒް ފިލްމަކަށް ފުރަތަމަ ފަހަރަށް ސޮއިކޮށްފި އެވެ.
މި ދެ ތަރިން އެކުގައި ކުޅޭ ފުރަތަމަ ފިލްމަކީ މީގެ ނުވަ އަހަރު ކުރިން ރޮމޭންޓިކް ކޮމެޑީ "ދޯސްތާނާ" ބެލުންތެރިންނަށް ގެނެސް ދިން ޑައިރެކްޓަރު ތަރުން މަންސުކާނީ ޑައިރެކްޓް ކުރާ ފިލްމް "ޑްރައިވް" އެވެ.
ކަރަން ޖޯހަރްގެ ދަރްމާ އަށް 2008 ގައި "ދޯސްތާނާ" ޑައިރެކްޓްކޮށް ދިން ފަހުން ތަރުން މިހާތަނަށް އެއްވެސް ފިލްމެއް ޑައިރެކްޓެއް ނުކުރެ އެވެ.
އެ ފިލްމްގައި ލީޑް ރޯލް ކުޅުނީ ޖޯން އަބްރަހަމް، ޕްރިޔަންކާ ޗޯޕްޅާ އަދި އަބިޝެކް ބައްޗަން އެވެ.
ކުރިން އަޑުތައް ފެތުރިފައި އޮތް ގޮތުން އޭނާގެ ދެވަނަ ފިލްމަކަށް ވާނީ "ދޯސްތާނާ 2" އެވެ.
އެހެން ނަމަވެސް އޭގެ ބަދަލުގައި އޭނާ ހަދާ "ޑްރައިވް" އަކީ ހަމަ އެ ނަމުގައި ނިކުތް ހޮލީވުޑް ފިލްމެއްގެ ރިމެކިންއެއް ކަމަށްވެ އެވެ.
ދެހާސް އެގާރަ ވަނަ އަހަރު ރިލީޒްވި "ޑްރައިވް" ގައި ލީޑް ރޯލް ކުޅެފައި ވަނީ ރަޔަން ގޮސްލިން އާއި ކެރީ މުލިގަން އެވެ.
ރިޕޯޓްތައް ބުނާ ގޮތުން "ޑްރައިވް" ގެ ޝޫޓިން ސުޝާންތު އާއި ޖެކޮލިން އަންނަ އެޕްރީލް މަހު ފަށާނެ އެވެ.