މި މަހުގެ 20 ވަނަ ދުވަހުގެ ރޭ އައްޑޫ ސިޓީ ކައުންސިލުން ބާއްވާ "އައްޑޫ އެވޯޑް 2016" ގެ ހަފުލާގެ އިވެންޓް މެނޭޖް ކުރާނެ ބަޔަކު ހޯދަން ކައުންސިލުން އިއުލާންކޮށްފި އެވެ.
ކައުންސިލުން ނެރުނު ބަޔާނެއްގައި ބުނީ އެ ހަފުލާގެ ސައުންޑާއި ލައިޓިން، ބެކްޑްރޮޕް އަދި ކެއުން ތައްޔާރުކޮށްދޭނެ ފަރާތެއް ހޯދަން ބޭނުންވާ ކަމަށެވެ.
އެހެންވެ މިކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު މި މަހުގެ 11 ވަނަ ދުވަހާ ހަމައަށް ވަނީ ހުޅުވާލައިފަ އެވެ. މިކަމާ ބެހޭ ގޮތުން މައުލޫމާތު ދިނުން މާދަމާ ހެނދުނު 10:00 ގައި ކައުންސިލް އިދާރާގައި އޮންނާނެ އެވެ.
ކައުންސިލުން އަދި ބުނީ މައުލޫމާތު ސާފުކޮށް ދޭ ސެޝަންގައި ބައިވެރި ނުވާ ފަރާތަކަށް ޕްރޮޕޯސަލް ހުށަހެޅުުމުގެ ފުރުސަތެއް ނޯންނާނެ ކަމަށެވެ.
އައްޑޫ ކައުންސިލުން ދޭ އެވޯޑްގައި ހިމެނެނީ ހަތަރު ގިންތިއެކެވެ. އެއީ ޝަރަފުވެރިކަމުގެ އިނާމާއި ހިތްވަރު ދިނުމުގެ އިނާމާއި ޚިދުމަތުގެ އިނާމާއި މަތީ ދަރަޖަ ހޯދާ ފަރާތްތަކަށް ދެވޭ އިނާމެވެ.
އެވޯޑް ދެނީ މައިގަނޑު 15 ދާއިރާއަކުންނެވެ.
މި އެވޯޑް ދޭން ނިންމާފައި ވަނީ މި އަހަރުން ފެށިގެން ކޮންމެ ތިން އަހަރަކުން އެއް އަހަރު އެވެ.