އައްޑޫގައި ގާއިމު ކުރަން ނިންމާފައިވާ ޒަމާނީ ޕޮލިސް ޓްރޭނިން ސެންޓަރު ބިންގާ މި މަހުގެ ތެރޭގައި އެޅުމަށް ތައްޔާރުވަމުން އަންނަ ކަމަށް ފުލުހުން ބުނެފި އެވެ.
އިންޑިޔާ ސަރުކާރުގެ ހިލޭ އެހީގެ ދަށުން ކުރިއަށް ގެންދާ 18 މިލިއަން ޑޮލަރުގެ މި ޕްރޮޖެކްޓްގެ މަސައްކަތް ނިމޭ އިރު ފުލުހުންގެ ޒަމާނީ ޓްރެއިނިން ސެންޓަރެއްގައި ހުންނަން ޖެހޭ ހުރިހާ ވަސީލަތްތަކެއް ފުރިހަމަ ވާނެ ކަމަށް ފުލުހުން ބުންޏެވެ.
އައްޑޫ ލިންކް ރޯޑްގައި ގާއިމު ކުރާ މި ޕޮލިސް ޓްރޭނިން ސެންޓަރުގައި ފެންވަރު ރަނގަޅު އެކޮމެޑޭޝަން ބްލޮކްތަކާއި، މެޑިކަލް ޚިދުމަތް ދޭނެ ކްލިނިކާއި، ޕީޓީ ގްރައުންޑާއި، ހެލިޕޭޑާއި އެހެންވެސް ޓްރެއިނިން ސެންޓަރެއްގައި ހުންނަން ޖެހޭ މުހިއްމު ވަސީލަތައް ވެސް ހިމެނޭނެ އެވެ.
މަސައްކަތް ފަށާތާ 18 މަސް ދުވަހުގެ ތެރޭގައި މަސައްކަތް ނިންމުމަށް މި ޕްރޮޖެކްޓް ހަވާލުކޮށްފައި ވަނީ އިންޑިޔާގެ ކުންފުންޏަކާ އެވެ.
ދެހާސް ވަނަ އަހަރު އިންޑިޔާ ސަރުކާރާ އެކު އެކުލަވާލެވުނު އެމްއޯޔޫގެ ދަށުން މި ސެންޓަރު އެޅުމަށް އެންމެ ފުރަތަމަ ހަމަޖެއްސީ ޅ. ދިއްފުށިމާދޫގަ އެވެ.
އޭގެ ފަހުން ކ. މާބިންހުރާ އަދި ދ. ވާނީގައި ވެސް މި ޕްރޮޖެކްޓް ހިންގުމަށް ހަމަޖެއްސި އެވެ.
އެހެން ނަމަވެސް ގިނަ ދުވަސްތަކެއް ފާއިތުވެ ދިގުލައިގެން ދިއުމަށް ފަހު އައްޑޫގައި މި ޕްރޮޖެކްޓް ކުރިއަށް ގެންދަން ނިންމީ އެވެ.
އެކަމަށް ބޭނުންވާ ބިން ވެސް މިހާރު ވަނީ ސާފުކޮށް ނިންމައިފަ އެވެ.