1. ހަޖަމް ކުރުމުގެ ނިޒާމަށް ފަސޭހަ ކޮށްދޭ
ބަނބުކޭލަކީ ވަރަށް ގިނަ އަދަދަކަށް ފައިބާ އެކުލެވިގެންވާ އެއްޗެކެވެ. ފައިބާއަކީ ޕެރިސްޓޯލްސިސް އާއި ގޭސްޓްރިކް ޖޫސްތައް އުފެދޭ މިންވަރު އިތުރު ކޮށްދޭ އެއްޗެކެވެ. އެހެންކަމުން ހަޖަމް ކުރުމަށް ފަސޭހަވެގެން ދެއެވެ. އޭގެ ސަބަބުން ބަނޑު ހަރުވުންފަދަ މައްސަލަތަކުން މީހާ ދުރުވެ، ގޮހޮރުގެ ކެންސަރު ފަދަ ނުރައްކާތެރި ބަލިތަކުން މީހާ ސަލާމަތް ކޮށްދެއެވެ. އަދި ހަމަ އެހެންމެ ފައިބާއަކީ އާޓެރީތަކުގައި ހުންނަ ކޮލެސްޓްރޯލް ނައްތާލަދޭ އެއްޗެކެވެ. އެއް ޖޯޑު ބަނބުކޭލުގައި އެތައް ގްރާމެއްގެ ފައިބާ ހިމެނެއެވެ.
2. ހަކުރު ލެވެލް ސްޓެބިލައިޒް ކޮށްދޭ
ގްލައިސީމިކް އިންޑެކްސް (ޖީއައި) އަކީ ލޭގައި ހަކުރު ހުންނަ މިންވަރު އިތުރުކުރުމުގެ ބާރުގެ މައްޗަށް ބިނާކޮށް ކާބޯތަކެތި ރޭންކް ކުރާ އިންޑެކްސް އެކެވެ. އެލިސްޓުގައި އެންމެ މަތީގައި ހުންނަ އެއްޗެހި (މިސާލަކަށް ހުދު ހަނޑުލާއި ހުދު ޕާން) އަކީ ވަރަށް އަވަހަށް ހަޖަމްވެ ހަކުރާއި އިންސުލިން ލެވެލްތައް ކުއްލިއަކަށް ވަރަށް މަތިކޮށްދީ، ލަސްލަހުން އެލެވެލް ދަށްކޮށްދޭ އެއްޗެހި އެވެ. އެގޮތުން ބަނބުކޭލަކީ ވަރަށް ލަސްލަހުން ހަޖަމްވާ އެއްޗަކަށް ވުމުން އޭގެ ސަބަބުން ހަކުރު މާބޮޑަށް މައްޗަށް ދިއުމާއި، ފޮނި އެއްޗެހި ކާހިތްވުން އަދި މީހާގެ މޫޑް ކުއްލި ކުއްލިއަށް ބަދަލުވުމުން ދުރު ކޮށްދެއެވެ.
3. ދުޅަހެޔޮ ލެވެލްއެއްގައި ބްލަޑް ޕްރެޝަރު ދަމަހައްޓައިދޭ
ދޮންކޭލަކީ ޕޮޓޭސިއަމް ގިނަވެފައި ސޯޑިއަމް މަދު ކަމަށް މަޝްހޫރު މޭވާއެކެވެ. އެހެންނަމަވެސް އެއް ޖޯޑު ބަނބުކޭލުގައި 1،078 މިލިގްރާމް ޕޮޓޭސިއަމް ހިމެނޭއިރު، އޭގައި ހިމެނެނީ އެންމެ 4.4 މިލިގްރާމް ސޯޑިއަމްއެވެ. އެހެންކަމުން ބަނބުކެޔޮ ކެއުމުން ލޭހޮޅިތަކަށް ފަސޭހަވެ، ބްލަޑް ޕްރެޝަރު ރަނގަޅު މިންވަރެއްގައި ދަމަހައްޓައިދެއެވެ.
4. އިންފެކްޝަންތަކާއި ހަނގުރާމަ ކުރުމަށް އެހީވެދޭ
އެއް ޖޯޑު ބަނބުކޭލުގައި ހަށިގަނޑަށް ދުވާލެއްގެ މައްޗަށް ވިޓަމިން ސީ ބޭނުންވާ މިންވަރުގެ 106 އިންސައްތަ އެކުލެވިގެންވެއެވެ. ވިޓަމިން ސީ އަކީ ވަރަށް ވަރުގަދަ ޤުދުރަތީ އެންޓިއޮކްސިޑެންޓެކެވެ. އޭގެ ސަބަބުން އިންފެކްޝަންތަކުން ހަށިގަނޑު ސަލާމަތްވެ، ކެންސަރަށް މަގުފަހި ކޮށްދޭ ފްރީ ރެޑިކަލްތައް ހަށިގަނޑުން ނައްތާލައެވެ.
5. ހިތުގެ ވަރުގަދަކޮށްދީ ދުޅަހެޔޮ ކޮށްދޭ
ފައިބާ، ވިޓަމިން ސީ، ވިޓަމިން ބީ6 އަދި ޕޮޓޭސިއަމް އަކީ ހިތުގެ ސިއްޙަތު ރަނގަޅު ކޮށްދޭ މާއްދާ ތަކެކެވެ. ދިރާސާއަކުން ދައްކާފައިވާ ގޮތުގައި ދުވަލަކު 4069 މިލިގްރާމް ޕޮޓޭސިއަމް ކައި އުޅޭ މީހުންނަށް އިސްކީމިއާ ނަމަކަށް ކިޔާ ހިތުގެ ބައްޔެއް ޖެހުމުގެ ފުރުސަތު 49 އިންސައްތަ ކުޑަ ކޮށްދެއެވެ.
6. ރޭގަނޑު އަރާމުކޮށް ނިދުމަށް އެހީވެދޭ
ނިދުމުގެ ކޮލިޓީ، ވަގުތު އަދި އަރާމުކަން އިތުރު ކޮށްދޭ މިނަރަލްއެއް ކަމަށްވާ މެގްނީސިއަމް ބަނބުކޭލުގައި ވަރަށް ގިނައިން ހުރެއެވެ. އަދި ހަމަ އެހެންމެ ބަނބުކޭލަކީ މެޓަބޮލިޒަމް ރަނގަޅު ކޮށްދީ، އިންސޯމްނިއާ ފަދަ ބަލިތައް ޖެހުމުން ދުރުހެލި ކޮށްދޭ އެއްޗެކެވެ.
7. ސިކުނޑީގެ މަސައްކަތް ރަނގަޅު ކޮށްދޭ
ޕޮޓޭސިއަމް، ފޯލޭޓް އަދި އެކިއެކި އެންޓިއޮކްސިޑެންޓްތައް ފަދަ ބަނބުކޭލުގައި ހުންނަ މާއްދާ ތަކަކީ ވަރަށް ގިނަ ނަފްސާނީ ފައިދާތައް ލިއްބައިދޭ މާއްދާ ތަކެކެވެ. އެގޮތުން ފޯލޭޓް އަކީ އަލްޒައިމާސް ފަދަ ސިކުނޑީގެ ބަލިތަކުން މީހާ ރައްކާތެރި ކޮށްދޭ އެއްޗެކެވެ. އަދި ޕޮޓޭސިއަމް އަކީ ސިކުނޑިއަށް ދުޅަހެޔޮ މިންވަރަކަށް ލޭދައުރު ކޮށްދިނުމުގައި އެހީތެރިވެދީ، ކަންކަމަށް ސަމާލުކަން ދިނުން އިތުރު ކޮށްދޭ މާއްދާއެކެވެ.
ބަނބުކޭލުގައި ހުންނަ ވިޓަމިން ބީ6 އަކީ ޑިޕްރެޝަންއިން ރައްކާތެރި ކޮށްދޭ އެއްޗެކެވެ. އެހެންނަމަވެސް ވިޓަމިން ބީ6 އެހާ ގިނައިން ކެއުން ރަނގަޅެއް ނޫނެވެ. ބޮޑު މީހަކަށް ދުވާލެއްގެ މައްޗަށް ކެއުން އަންގާފައި އޮންނަނީ ގިނަވެގެން 100 މިލިގްރާމް ވިޓަމިން ބީ6 އެވެ. އެހެންނަމަވެސް ޑޮކްޓަރެއް ލަފާއާއި ނުލައި ބޮޑު މީހަކަށްވެސް އެހާ ގިނައިން އެވިޓަމިން ބޭނުމެއް ނުވާނެއެވެ.