1. އަޔަން ހުންނަ މިންވަރު އިތުރު ކޮށްދޭ
އަޔަން އަކީ ދިރިއުޅުމުގެ ހުރިހާ ވަގުތެއްގައިވެސް ކޮންމެ އަންހެނަކަށްވެސް ވަރަށް މުހިންމު މާއްދާއެކެވެ. އެހެންނަމަވެސް މާބަނޑު ދުވަސްވަރު އޭގެ މުހިންމުކަން އެއަށްވުރެ އިތުރުވެގެން ދެއެވެ. އަޔަން އަކީ ލޭގައި ހިމޮގްލޮބިން ހުންނަ މިންވަރު އިތުރު ކޮށްދޭ މާއްދާއެކެވެ. އެހެންކަމުން ހަށިގަނޑުގައި އަޔަން ހުންނަ މިންވަރު އިތުރު ކުރުމަށްޓަކައި މާބަނޑު އަންހެނުން ބީޓްރޫޓް ޖޫސް ބުއިމަކީ ޑޮކްޓަރުން ލަފާ އަރުވާ ކަމެކެވެ. މާބަނޑު ދުވަސްވަރު ބީޓްރޫޓް ޖޫސް ބުއިމަކީ އެނީމިއާ ބަލިން ރައްކާތެރި ކޮށްދޭ ކަމެކެވެ.
2. ވިޓަމިން ސީ އެކުލެވިގެންވޭ
ބީޓްރޫޓްގައި ވިޓަމިން ސީވެސް ހުރެއެވެ. މި ވިޓަމިން އަކީ ބީޓްރޫޓްގައި ހުންނަ އަޔަން ހަށިގަނޑަށް ނަގައިގަތުމަށް އެހީތެރިވެދޭ އެއްޗެކެވެ. މާބަނޑު ދުވަސްވަރު ބީޓްރޫޓް ޖޫސް ބޯނަމަ، ދަރިފުޅަކީ ވިހާއިރު ސިއްޙަތު ރަނގަޅު އަދި ވަރުގަދަ ކުއްޖަކަށް ވުމުގެ ފުރުސަތު ބޮޑުވެގެން ދެއެވެ. އެހެންނަމަވެސް، އެގޮތަށް ޢަމަލު ކުރުމުގެ ކުރިން އަބަދުވެސް އެމީހަކު ބަލާ އަންހެނުންގެ ޚާއްސަ ޑޮކްޓަރަކަށް (ގައނަކޮލޮޖިސްޓް) ދައްކައި އޭނާގެ ލަފާ ހޯދުން މުހިންމެވެ.
3. މެއިގެ ސިއްޙަތު ރަނގަޅު ކޮށްދޭ
ބީޓްރޫޓްގައި ބީޓަސަޔަނިން ނަމަކަށް ކިޔާ ޕިގްމެންޓެއް ހުރެއެވެ. އެއީ ލިވާ (މެއި) އާއި ލޭގައި ހުންނަ ވިހަ މާއްދާތައް ނައްތާލަދޭ އެއްޗެކެވެ. އެހެންކަމުން ބީޓްރޫޓަކީ ހަށިގަނޑުން ވިހަ ނައްތާލުމަށް އެހީވެދޭ އެއްޗެކެވެ. އޭގެ ނަތީޖާއެއްގެ ގޮތުން ހަށިގަނޑުގައި ޖަމާވުމަށް ފެޓީ އެސިޑްތަކަށް ފުރުސަތު ނުލިބޭނެއެވެ. ދުޅަހެޔޮ މެއި ހުންނަ މީހަކީ ހަޖަމް ކުރުމުގެ ނިޒާމުވެސް ރަނގަޅަށް މަސައްކަތް ކުރާ އަދި މާބަނޑު ދުވަސްވަރު ވަރަށް ފިޓް އަދި ދުޅަހެޔޮ ހަށިގަނޑެއް ހުންނާނެ މީހެކެވެ. ގިނަ އަދަދެއްގެ އަންހެނުންގެ ބަރުދަން މާބަނޑު ދުވަސްވަރު މައްޗަށް ދެއެވެ. އެހެންކަމުން ބީޓްރޫޓް ކެއުމުން އެކަން ކޮންމެވެސް ވަރަކަށް ހުއްޓާލެވޭނެއެވެ.
4. ފޯލިކް އެސިޑް ހިމެނޭ
މާބަނޑު ދުވަސްވަރު ދަރިފުޅު އެކަށީގެންވާ ގޮތަށް ބޮޑުވުމަކީ ވަރަށް މުހިންމު ކަމަކަށް ވާއިރު، އެކަމަށް އެންމެ ބޮޑު އެހީތެރިކަމެއް ފޯރުކޮށްދެނީ ފޯލިކް އެސިޑް އިންނެވެ. ރޯ ބީޓްރޫޓްގައި ހުންނަ ފޯލިކް އެސިޑް އަކީ ބަނޑުގައިވާ ދަރިފުޅު ހެދިބޮޑުވުމަށް މުހިންމު މާއްދާއެކެވެ. އަދި ހަމަ އެހެންމެ ރެޑް ބްލަޑް ސެލްސް އުފެދުމުގައިވެސް އެހީތެރިވެދޭ އެއްޗެކެވެ.
5. މާބަނޑު ދުވަސްވަރު ލޭ ސާފު ކޮށްދޭ
ނިއުޓްރިއެންޓްތަކުން ފުރިގެންވާ މި ތަރުކާރީއަކީ ލޭ ސާފު ކުރުމުގެ ޤާބިލުކަންވެސް ލިބިފައިވާ އެއްޗެކެވެ. އަދި ހަމަ އެހެންމެ އުފެދުމުގައި ދިމާވާ މައްސަލަތަކުންވެސް ދަރިފުޅު ރައްކާތެރި ކޮށްދެއެވެ. ބީޓްރޫޓް އަކީ މާބަނޑު އަންހެނުންގެ ޖިސްމާނީ ބާރު އިތުރު ކޮށްދޭ އެއްޗަކަށް ވީއިރު، އެކަމުގެ ސަބަބުން ވިހެއުމުގައިވެސް ވަރަށް ބޮޑަށް ފަސޭހަވެގެން ދެއެވެ. އަދި ހަމައެހެންމެ ބީޓްރޫޓްގައި ކާބޯހައިޑްރޭޓް، ވިޓަމިން އޭ އަދި ބީ، ސޮލިއުބަލް ފައިބާ އާއި ޕްރޮޓީންވެސް ހިމެނެއެވެ. އޭގެ އިތުރުން ބީޓްރޫޓް އަކީ ލޭމައްޗަށް ދިއުމުގެ މައްސަލަވެސް ހައްލު ކޮށްދޭ ތަރުކާރީއެކެވެ.