ދިވެހިރާއްޖޭގެ ވެރިރަށް މާލެ އާއި އަތޮޅު ތެރޭގެ ރަށްތަކުގެ މެދުގައި މައި ސަރުކާރުން ތަފާތު ކުރުންތައް ގެންގުޅޭ ވާހަކަ އަކީ އާ ވާހަކައެއް ނޫނެވެ. އެވާހަކަ ނުދެއްކި ނަމަވެސް އެކަން އިޙްސާސް ނުކުރެވޭ އަދި ތަޖުރިބާ ނުކުރާ މީހަކު ނުހުންނާނެއެވެ. ތިމާއަށް ލިބެން އޮތް މަންފާއަކަށް ޓަކައި ބައެއް މީހުން އެވާހަކަ ދައްކަން ބޭނުން ނުވުމަކީ، އެހެން ކަމެކެވެ.
ޤަބޫލުކުރަން ޖެހޭ ހަގީގަތަކީ، މާލެ އާއި ރާއްޖޭގެ އެހެން ރަށްތަކާމެދު ސަރުކާރުން ޒަމާނުއްސުރެ ގެންގުޅެމުން އަންނަ ތަފާތުކުރުންތައް ނައްތާލެވިގެން ނޫނީ ރައްޔިތުން އެދޭ ހަމަޖެހުމެއް ނުގެނެވޭނެ ކަމެވެ.
"ގޫގުލް އަށްވުރެ ބާރު ސްޕީޑްގައި' ތަރައްޤީގެ މަޝްރޫޢުތައް ހިންގާކަމަށް ސަރުކާރަށް ނިސްބަތްވާ މެމްބަރުން ވިދާޅުވާއިރު މާލެ އަށް ރައްޔިތުން ހިޖުރަކުރުމާއި އެކި ބޭނުންތަކަށް ދެއިރު ދެދަޅައަށް މާލެ އަށް ނުގޮސް ވާނެ ގޮތެއް އަތޮޅު ތެރޭގެ ރައްޔިތުންނަށް ފަހިކޮށްދޭން މިހާތަނަށް ސަރުކާރުން އެއްވެސް މަސައްކަތެއް ކުރި ހެއްޔެވެ؟
ސަރުކާރުގެ ވެރިން މިނެކިރުއްވާގޮތުގައި ތަރައްޤީ އަކީ ފުޓްސަލް ދަނޑުތަކެވެ. ރަށެއްގެ މަގު ތާރު އަޅައިގެން ހެދުމެވެ. އެސްޓީއޯ މެދުވެރިކޮށް ކޮންމެ ރަށެއްގައި ހުޅުވި ބޭސް ފިހާރަތަކެވެ. ބޭސް ފިހާރައެއް ހުއްޓަސް ޑޮކްޓަރަކު ރަށުގައި ނެތުމުން ޑޮކްޓަރަށް ދައްކަން ދާން ޖެހެނީ މާލެއަށެވެ. ޑޮކްޓަރު ހުރިއްޔާ ބޭސްފިހާރައިން ބޭހެއް ނުލިބޭނެއެވެ. އެކަމަށް ވެސް ދުވަން ޖެހޭނީ މާލެއަށެވެ.
ރަށުގައި އަޅާ ފުޓްސެލް ދަނޑަކުން ޒުވާނުންނަށް ވަޒީފާ ލިބޭ ހެއްޔެވެ؟ ރަށުގައި އަޅާ ބޭސް ފިހާރައަކުން ސިއްޙީ ޚިދުމަތް ފުރިހަމަވީ ހެއްޔެވެ؟ ސަރުކާރުން ހިންގާ ބިޔަ ހުރިހާ މަޝްރޫޢުތަކެއްވެސް އަމާޒުވަނީ މާލެއަށް ނުވަތަ ގްރޭޓާރ މާލެއަށް މީހުން ޖަމަޢުކުރުމުގެ ވިސްނުމަށެވެ.
ސަރުކާރުގެ 'ހިތް ހެޔޮކަމުން' ތަބަކަށް ލައިގެން ދިން ވަޒީފާ ގެއްލިދާނެތީ ސަރުކާރުގެ "ހަބޭސް" ކަމުގެ ވާހަކަ ދައްކަވާ ފަރާތްތަކުން ޤަބޫލުކުރަން ބޭނުން ނުވިޔަސް އަަތޮޅުތެރޭގެ ރައްޔިތުންގެ އެންމެ ބޮޑު ކަންބޮޑުވުން އަދިވެސް އޮތީ ހަމަ އެގޮތުގައެވެ. އެބޭފުޅުން ވެސް ހިމެނޭ ގޮތަށް "ރާއްޖެތެރެ" ވީމަ ދިމާވާ ހިތްދަތިކަމާއި ތަދުތަކަށް އެއްވެސް ފަރުވާއެއް ނުލިބެއެވެ. ހަގީގަތަކީ، އެ ތަދު އިތުރަށް ބޮޑުވީއެވެ. އަދިވެސް ބޮޑުވަމުން ދަނީއެވެ.
ސަރުކާރުގެ ވެރިން އަތޮޅުތެރޭގެ ރަށްތަކަށް ގޮސް މާލެ ތަރައްޤީކުރާ ވާހަކަ ދެއްކުމުން އެކަމަށް "ޝުކުރިއްޔާ" ބުނުން ނޫންގޮތެއް އެމީހުންނަށް ނެތީޔޯލައެވެ.
ސަރުކާރުގެ އޮތީ އެންމެ ސިޔާސަތެކެވެ. އެއީ ގްރޭޓަރ މާލެ ތޮއްޖެއްސުމުގެ ސިޔާސަތެވެ. އެ ސިޔާސަތު ތަންފީޒުކުރަން ސަރުކާރުން ބޭނުންވާ މިންވަރު ހާމަވާ އެއްކަމަކީ، ދޭތެރެއަކުން "ހުޅުމާލެއަށް އައުމަށް" ޤައުމުގެ ރައީސް އެދިލައްވައެވެ. ހަގީގަތުގައި އެ ގޮވާލަނީ، "ކުލި ދައްކަން އަންނާށެވެ." މިހެން ނޫން ހެއްޔެވެ؟
ކުލި ދައްކަން މާލެ ގެނައުމުގެ ސިޔާސަތަށްޓަކައި ޤާނޫނުއަސާސީ އިން އެކަށެއެޅި ލާމަރުކަޒީ ނިޒާމްވެސް ފުނޑާލީއެވެ. ފަހަރަކު ބާރެއް އަތުލަމުންގޮސް ކައުންސިލްތަކަކީ މިހާރު ޤަބުރުސްތާނުތަކަށް ހަދައިފިއެވެ.
ރައީސް ޔާމީންގެ ރިޔާސީ ކެމްޕެއިންގައި އެންމެ ހަރުއަޑުން ވިދާޅުވި ވާހަކައަކީ ރާއްޖޭގެ ދެ ސަރަޙައްދެއް ޙަޤީޤީ ސިޓީއެއްގެ ދަރަޖައަށް ތަރައްޤީކޮށް ސިއްްޙީ ޚިދުމަތާއި ވަޒީފާއާއި ތަޢުލީމަށް މާލެ ހިޖުރަކުރުން ހުއްޓުވާލައްވާނެ ވާހަކައެވެ. އެމަނިކުފާނުގެ ރިޔާސީ ވައުދުތަކުގެ %80 ފުރިހަމަ ކުރެވުނު ކަމަށް ވިދާޅުވި އިރު އަދިވެސް މިފެންނަނީ މާލެއަކުން ނުނެއްޓިގެން އުޅޭ މަންޒަރެވެ.
މާލެ ފިޔަވައި ރަށަކަށް ކަމެއް ކޮށްދޭންވެއްޖެނަމަ ބަޖެޓް ލިބޭކަމަކަށް ނުވެއެވެ. ދިވެހި ދައުލަތް ވަރުގެ "ފަަޤީރު" ދައުލަތެއް ނެތް ކަހަލައެވެ. އެހެންވިޔަސް ދެއިރު ދެދަޅަޔަށް މާލޭގައި ބޭނުން މަޝްރޫޢެއް ހިންގެއެވެ. މާލޭގެ ހުޅަނގު ފަރާތު މޫދަށް 40 އަށްވުރެ ގިނަ މިލިއަން ރުފިޔާ އަޅައިގެން ނަޖިސް ހޮޅިއެއްކައިރީގައި އާޓިފިޝަލް ބީޗެއް ހަދަން ބަޖެޓް ހުހެއްނުވެއެވެ. ބޭނުންވީމަ މާލޭ ކޮންމެ ދިމާލެއްގައި ޕާކު އަޅާނެ ބަޖެޓްވެސް ލިބެއެވެ. އެހެނަސް ކޮންކްރީޓް މަސައްކަތް ނިމުނުތާ އެތައް އަހަރުތަކެއްވީ ސްކޫލްތަކުގެ މަސައްކަތްތައް ނިންމައިދޭނެ ފައިސާއެއް ބަޖެޓުގައި ހުރިކަމަކަށް ނުވެއެވެ. ނަރުދަމާ އަޅައިދޭން ބުނެ ކުރި ވަޢުދުތަކަށް ވާގޮތެއް ނޭނގެއެވެ.
ރާއްޖޭގެ ރަށްތައް ފަޅުކޮށް މާލޭ ސަރަޙައްދު ތޮއްޖެއްސުމުގެ ސިޔާސަތު ސަރުކާރުގެ އޮތްކަން ބުނަން ޖެހެނީ ރަށްތަކުން މީހުން މާލެއަށް ހިޖުރަކޮށް ކުލީގެ އަޅުވެތިކަމުގައި އުމުރު ފަނާކޮށްލަން މަޖުބޫރުކުރުވާ ސަބަބުތައް ނައްތާލުމަށް ސަރުކާރުން އެއްވެސް ކަމެއް ކުރުމެއްނެތި އެ ސަބަބުތައް ދަމަހައްޓަން އެހީތެރިވެދޭތީއެވެ.
ރާއްޖޭގެ ރަށްތައް ފަޅުކޮށް މާލޭ ސަރަޙައްދު ތޮއްޖެއްސުމުގެ ސިޔާސަތު ސަރުކާރުގެ އޮތްކަން ބުނަން ޖެހެނީ ރަށްތަކުން މީހުން މާލެއަށް ހިޖުރަކޮށް ކުލީގެ އަޅުވެތިކަމުގައި އުމުރު ފަނާކޮށްލަން މަޖުބޫރުކުރުވާ ސަބަބުތައް ނައްތާލުމަށް ސަރުކާރުން އެއްވެސް ކަމެއް ކުރުމެއްނެތި އެ ސަބަބުތައް ދަމަހައްޓަން އެހީތެރިވެދޭތީއެވެ.
އަތޮޅުތެރެއިން ނަރުސް ކޯސް ހެދެއެވެ. އެހެނަސް އެ ކޯސް ހަދައިގެން ވަޒީފާ ހޯދަން ގްރޭޓާރ މާލެއަށް އަންނަން މަޖުބޫރުކުރުވަނީ ސަރުކާރުގެ ސިޔާސަތެވެ. މާލެއަށް އެންމެ ބޮޑު އާމްދަނީއެއް ލިބެނީ ސިއްޙީ ޚިދުމަތް ހޯދުމަށް މާލެއަށް އަންނަ މީހުންގެ ފަރާތުންކަމަށް ދާދިފަހުން ކުރި ސާވޭއަކުން ވަނީ ހާމަވެފައެވެ. ރައްޔިތުން އެ ބޮޑު ހޭދަކުރުން ހުއްޓުވުމަށް ރާއްޖޭގެ ދެ ސަރަޙައްދެއް ތަރައްޤީކުރުމުގެ ވިސްނުމެއް ސަރުކާރުގެ ނެތެވެ.
ސަރުކާރުގެ ވިސްނުން ހުރީ ކޮންމެ ރަށެއްގައި ބޭސް ފިހާރައެއް ހުޅުވުމަށްފަހު ޑޮކްޓަރަށް ދައްކަން ބަލިމީހާ މާލެ ގެނައުންކަމަށް ވެދާނެއެވެ. އެހެން ބުނަން ޖެހެނީ ރަށްރަށުގެ ސިއްޙީ ޙާލަތު އެހާ ދަށުދަރަޖައަކަށް ވެއްޓިފައި އޮތީތީއެވެ. ވިއްސަން ހޭނައްތާ މީހާ ހޭނާރައިގެން ގެންނަން ޖެހެނީ މާލެއަށެވެ. އެކްސިޑެންޓެއް ހިނގައިފިނަމަ އަނިޔާލިބޭ މީހާ ފުރާނަ ނުދާހާ ހިނދަކު މާލެ ނައިސް ފަރުވާއެއް ލިބޭނެ ގޮތެއް ނެތެވެ.
އަތޮޅުތެރޭގެ ރަށްރަށުގެ މީހުން ކުރަންވީ ކަމަކީ 'ކުލިދައްކަން' މާލެއައުމެވެ. އެނޫންގޮތެއް ނެތެވެ. ސަރުކާރުގެ ސިޔާސަތުތަކުން އެނޫން މަންޒަރެއް ފެންނާކަށްނެތެވެ.