އެންމެ މޮޅު ފިލްމަކަށް ބައިލައްކަ ރުފިޔާ ލިބޭ ކުރު ފިލްމް ފެސްޓިވަލަކަށް ރާއްޖެ ޓީވީން ފުރުސަތު ހުޅުވާލައިފި އެވެ.
އެ ޗެނަލުން ބުނީ މި ފެސްޓިވަލްގައި ބައިވެރިވާން ބޭނުންވާ މީހުންނަށް އަންނަ މާޗް މަހުގެ 31 އާ ހަމައަށް ފިލްމްތައް ބައިވެރި ކުރުމުގެ ފުރުސަތު ހުޅުވާލާފައިވާ ކަމަށެވެ.
ފެސްޓިވަލަށް ހުށަހަޅަން ޖެހެނީ 3-10 މިނިޓާ ދެމެދުގެ ފިލްމުތަކެވެ. ފިލްމްތައް ހުށަހަޅަން ޖެހެނީ އެކަމަށް ހާއްސަކޮށް ރާއްޖެ ޓީވީން ދޫކުރާ ފޯމާ އެކު، ސީޑީގައި ނުވަތަ ޕެން ޑްރައިވެއްގަ އެވެ.
ކުރު ފިލްމް ފެސްޓިވަލަށް ހުށަހަޅާ ފިލްމްތައް ޖަޖު ކުރާނީ ފިލްމީ ދާއިރާގެ ތަޖުރިބާކާރުން ކަމަށް ރާއްޖެ ޓީވީން ބުންޏެވެ.
މި ފެސްޓިވަލްގައި އެންމެ މޮޅު ފިލްމް، އެންމެ މޮޅު ސްކްރީންޕްލޭ، އެންމެ މޮޅު ޑައިރެކްޓަރު، އެންމެ މޮޅު އެކްޓަރު، އެންމެ މޮޅު އެކްޓްރެސް، އެންމެ މޮޅު އެޑިޓިން އަދި އެންމެ މޮޅު މިއުޒިކް ހޮވާނެ އެވެ.
އެންމެ މޮޅު ފިލްމަކަށް ހޮވޭ ފިލްމަކަށް އިނާމެއްގެ ގޮތުގައި 50،000ރ. ލިބޭނެ އެވެ.