ބަރުދަން ލުއި ކުރުމަށް ކުރުނބާ ބޭނުން ކުރުމަކީ އެހާ ގިނައިން އަޑުއިވޭ ވާހަކައެއް ނޫނެވެ. ކުރުނބާއަކީ ގިނަ އަދަދަކަށް ސެޗުރޭޓެޑް ފެޓް ކޮންޓެންޓް ހުންނަ މޭވާއެކެވެ. އެހެންނަމަވެސް ކުރުނބާގެ ސަބަބުން ވަރަށް ގިނަ ފައިދާތަކެއް ހަށިގަނޑަށް ލިބެއެވެ.
1. ގިނަ އަދަދަކަށް ހަކަތަ ލިއްބައިދޭ
ކުރުނބާގައި ހުންނަ ސެޗުރޭޓެޑް ފެޓްއަކީ އާދައިގެ ސެޗުރޭޓެޑް ފެޓްއެއް ނޫނެވެ. އެއީ މީޑިއަމް-ޗެއިން ޓްރައިގްލިސެރައިޑް ނުވަތަ އެމްސީޓީގެ ނަމުން ނަންދެވިފައިވާ ވައްތަރެކެވެ. އެއީ ވަރަށް މަދުން ނޫނީ ހަށިގަނޑުގައި ރައްކާ ކުރެވިފައި ހުންނަ ފެޓްއެއް ނޫނެވެ. އެވައްތަރުގެ ފެޓްއަކީ ކާބޯހައިޑްރޭޓްތައް ފަދައިން ލޭގައި ހަކުރު ހުންނަ މިންވަރު އިތުރު ނުކޮށް، ހަށިގަނޑަށް ހަކަތަ ލިއްބައިދޭ އެއްޗެކެވެ. އިންޑަނޭޝަނަލް ޖާނަލް އޮފް އޮބޭސިޓީ އެންޑް މެޓަބޮލިކް ޑިސްއޯޑާސްއިން ކުރި ދިރާސާއަކުން ސާބިތުކޮށް ދީފައިވާ ގޮތުގައި އެމްސީޓީ އަކީ ފެޓްއާއި ކެލޮރީތައް ވިރުވުމަށް އެހީތެރިވެދޭ އެއްޗެކެވެ.
2. ލޯ-ކާބް އެއްޗަކަށްވުން
ކުރުނބާއަކީ އެހާގިނައިން ކާބޯހައިޑްރޭޓް އެކުލެވިގެންވާ އެއްޗެއް ނޫނެވެ. އެގޮތުން ކޮންމެ 100 ގްރާމް ކުރުނބާގައި ހުންނަނީ އެންމެ 15 ގްރާމް ކާބޯހައިޑްރޭޓްއެވެ. އެހެންކަމުން ކާކެއުމުގައި ބޭނުން ކުރެވޭ ކާބޯހައިޑްރޭޓް މަދުކުރަން ބޭނުންނަމަ، ކުރުނބާ ނުވަތަ ކާށި ބޭނުން ކުރާށެވެ.
ކުރުނބާގައި މަދުން ކާބޯހައިޑްރޭޓް ހުރެފައި އޭގައި ހުންނަ އެމްސީޓީ އިން ފެޓް ވިރުވުމަށް އެހީތެރިވެދިން ނަމަވެސް، ކުރުނބާއާއި ކާށިއަކީ ވަރަށް ގިނައިން ކެލޮރީ ހުންނަ އެއްޗެކެވެ. އެގޮތުން ބަލާއިރު ކޮންމެ 100 ގްރާމް ކުރުނބާގައި 354 ކެލޮރީސް ހިމެނެއެވެ. އެހެންކަމުން އެހާ ގިނައިން ކާށި އަދި ކުރުނބާ ބޭނުން ކުރުމަކީ ރަނގަޅު ކަމެއް ނޫނެވެ. ޑައިޓީޝަނުން ލަފާ ދޭގޮތުގައި ދުވާލަކަށް ބޭނުންވާ ކެލޮރީތަކުގެ 100 ބައިކުޅަ އެއްބައި ފުއްދުން ރަނގަޅީ ކުރުނބާ ނުވަތަ ކާށިންނެވެ. އެހެންކަމުން މިސާލަކަށް 1500 ކެލޮރީސް ދުވާލަކަށް ކާންޖެހޭނަމަ، އޭގެތެރެއިން 150 ކެލޮރީސް އަށް ވާވަރަށް ކާށިއާއި ކުރުނބާ ކާށެވެ.