ސަރުކާރު ބޯހިޔާވަހިކަމުގެ ޕްރޮގްރާމްގެ ދަށުން ހުޅުމީދޫގައި އިމާރާތްކޮށްފައިވާ ފްލެޓްތަކަށް ކުރިމަތިލުމުގެ ފުރުސަތު ހައުސިން މިނިސްޓްރީން އަލުން މިއަދު ހުޅުވާލައިފި އެވެ.
އެ ރަށުގައި ހަދާފައިވާ 48 ފްލެޓްގެ ތެރެއިން 38 ފްލެޓަށް މިދިޔަ އަހަރުގެ މެއި މަހު ހުޅުވާލުމުން އެކަށީގެންވާ އަދަދަށް މީހުން ކުރިމަތިލާފައެއް ނުވެ އެވެ.
ހައުސިން މިނިސްޓްރީން ބުނީ ކުރިން ހުޅުވާލި ފުރުސަތުގައި ކެޓަގަރީ A އަށް އެކަށީގެންވާ ޢަދަދަށް ފޯމް ހުށަހަޅާފައިނުވާތީ އާއި ހުޅުދޫ-މީދޫ އަވަށަށް ދިރިއުޅުން ބަދަލުކުރަން ބޭނުންވާ އެހެން ރަށްރަށުގެ ފަރާތްތަކަށް ވެސް ފުރުޞަތު ދިނުމުގެ ބޭނުމުގައި ކެޓަގަރީ C އިތުރުކޮށް މެއި 31، 2016 ގައި އިޢުލާން ކުރެވުނު އުޞޫލަށް ބައެއް ބަދަލު ގެނެސް، ފްލެޓަށް އެދި ހުށަހެޅުމުގެ ފުރުޞަތު އަލުން ހުޅުވާލަނީ ކަމަށެވެ.
އެގޮތުން ފްލެޓަށް އެދޭ ފޯމް މި މަހުގެ 22 އިން ފެށިގެން ހުޅުވާލާ ގޮތަށް ވަނީ ނިންމާފަ އެވެ.
މިނިސްޓްރީން ބުނީ ފްލެޓަށް އެދޭ ފޯމް ހިތަދޫގައި ހުންނަ މި މިނިސްޓްރީގެ ލޭންޑް، ބިލްޑިން އެންޑް މުނިސިޕަލް ސާވިސަސް ޑިޕާޓްމަންޓާއި އެ މިނިސްޓްރީގެ ހުޅުމީދޫ ސެކްޝަނުން ލިބޭނެ ކަމަށެވެ.
ފޯމް ހުށަހަޅަން ޖެހޭ ސުންގަޑިއަކީ މާޗް މަހުގެ 2 އެވެ.
ހުޅުމީދޫގެ އިތުރުން ހިތަދޫގައި ވެސް ވަނީ 264 ފްލެޓް އަަޅާފަ އެވެ. ފްލެޓްތައް ދޫނުކުރެވި ލަސްވާތީ، އައްޑޫގެ ބައެއް މީހުން މިހާރު ދަނީ ކަންބޮޑުވުން ވެސް ފާޅު ކުރަމުންނެވެ.
މި އަހަރު ފޭދޫގައި އިތުރު 100 ފްލެޓް އަޅަން ވެސް ސަރުކާރުން ވަނީ ނިންމާފަ އެވެ.