އަންހެނުންނަށް ކުރިމަތިވެދާނެ ޖިންސީ ގޯނާއަކުން ރައްކާތެރިކޮށް ދޭނެ ޓައިޓް ބޮކްސާއެއް ޖަރުމަންގެ އަންހެނަކު އުފައްދައި މާާކެޓަށް ނެރެފި އެވެ.
"ސޭފް ޝޯޓް" ގެ ނަން ދީފައިވާ މި ބޮކްސާ އުފައްދާފައި ވަނީ ޖިންސީ ގޯނާ ކުރަން މަސައްކަތް ކުރާ މީހަކަށް އެ ބޮކްސާ ވީދައި ނުލެވޭ ކަހަލަ މެޓީރިއަލުންނެވެ. އަދި އެ ބޮކްސާ އިންނަނީ ތަޅުލެވޭ ގޮތަށާއި ގޯނާއެއް ކުރަން އުޅެފި ނަމަ، އަޑުން ސިގްނަލް ވެސް ފޮނިވައިދޭ ގޮތަށެވެ.
"ސޭފް ޝޯޓް" ވުޖޫދަށް ގެނައި ސަންޑްރާ ސެއިލްޒް ބުނީ އަންހެނުންނަށް ހާއްސަކޮށްގެން މިފަދަ އުފެއްދުމެއް ތައްޔާރު ކުރަން ނިންމީ އަމިއްލަ އަށް ކުރަން ޖެހުނު ތަޖުރިބާއަކާ ހެދި ކަމަށެވެ.
އޭނާ ބުނީ އެއް ފަހަރު ޖޮގިން އަށް ނިކުމެ އުޅެނިކޮށް، ފިރިހެނުންތަކެއް އޭނާއާ ދިމާކޮށްލައި، އޭނާ ލައިގެން ހުރި އެއްޗެހި ބާލުވައި ޖިންސީ ގޯނާ ކުރަން މަސައްކަތްކޮށްފައިވާ ކަަމަށެވެ.
އެހެންވެ އެފަދަ މީސްމީހުންގެ ކިބައިން އަންހެނުންނަށް "ސޭފް ޝޯޓް" ގެ ސަބަބުން މިހާރު ރައްކާތެރިކަން ލިބޭނެ ކަމަށް ސަންޑްރާ ބުންޏެވެ.
އޭނާ ވުޖޫދަށް ގެނައި "ސޭފް ޝޯޓް" ގެ ދެ ވައްތަރެއް މިހާރު ބާޒާރުން ލިބެން ހުންނާނެ އެވެ. އެއީ ޖޮގިން އަށް ދާ އިރު ލާން ހާއްސަކޮށް އުފައްދާފައިވާ ބޮކްސާ އާއި އާންމުކޮށް ލާން ތައްޔާރުކޮށްފައިވާ ބޮކްސާ އެވެ.
މި ދެ ވައްތަރުގެ އަގަށް ބަލާ އިރު ޖޮގިން އަށް ހާއްސަ ބޮކްސާގެ އަގަކީ 160 ޑޮލަރެވެ. އާދައިގެ "ސޭފް ޝޯޓް" ގެ އަގަކީ 107 ޑޮލަރެވެ.
މި ބޮކްސާ ވިއްކަމުން އަންނަ ކުންފުނިން ބުނީ ޖަރުމަންގެ އިތުރުން ޖަޕާން، ފިންލަންޑް، ސްވިޑްން، އިޓަލީ، ޓައިވާން އަދި އެމެރިކާ ފަދަ ގައުމުތަކުން "ސޭފް ޝޯޓް" އަށް އޯޑަރު ލިބެމުން އަންނަ ކަމަށެވެ.