ލޯކަލް ކައުންސިލް އިންތިޚާބު ބޯމަތިވެފައިވާއިރު ސަރުކާރުން ކިޔާ ލަވައަކީ މިއީއެވެ. ރަށްރަށުގައި ތަރައްޤީގެ މަޝްރޫޢު ހިންގެން އޮތީ އެ ރަށެއް ނިސްބަތްވާ އަތޮޅެއް ނުވަތަ ސިޓީއެއްގެ ކައުންސިލްގެ މެޖޯރިޓީ ސަރުކާރަށް ލިބިގެން ކަމަށެވެ. ސަރުކާރަށް ނިސްބަތްވާ މަޖިލިސް މެންބަރުންގެ ވާހަކަ އަކީ ވެސް އެެއީއެވެ.
ސަރުކާރާއި ސިޔާސީ ގޮތުން ޚިޔާލު ތަފާތު ޕާޓީއެއްގެ މެންބަރަކު ކައުންސިލްގައި ހުރެއްޖެ ނަމަ، ރަށުގައި މަޝްރޫޢުތައް ހިންގުމަށް ހުރަސް އެޅޭ ކަމަށް ތަފާތު އެކި މުނާސަބަތު ތަކުގައި ސަރުކާރުގެ ވެރިން ވަނީ ވިދާޅުވެފައެވެ. އެހެން ނަމަވެސް، ހުރިހާ ބާރުތަކެއް އަތުލައި، ވިހާ މަރުވާ ބެލެހެއްޓުމާއި ހަވާލުކޮށްފައިވާ އައްޑޫ ސިޓީ ކައުންސިލުން ސަރުކާރަށް ޖެއްސުން ކުރަން ކުރެވޭނެ ގޮތެއް މިހާރަކު ނޯންނާނެއެވެ.
އައްޑޫގެ ހުރިހާ މަގެއް މިހާރު އޮތީ ހައުސިން މިނިސްޓްރީގެ ބެލުމުގެ ދަށުގައެވެ. މަގުން ދުއްވުމުގެ ހައްޤު ލިބުނަސް، އެމަގުތަކުގެ ފެންވަރު ރަގަޅު ކުރުމަށް ކައުންސިލުން ކުރާނެ ކަމެއް ނެތެވެ. އަދި މަގުތައް މަރާމާތު ކުރަން ކުރާ މަސައްކަތެއް ހުއްޓުވަން ކައުންސިލަށް ކުރެވޭނެ ކަމެއް ވެސް ނެތެވެ. ހައުސިން މިނިސްޓްރީ އިން ބޭނުން ނަމަ މަގުތައް މަރާމާތުކުރަންވީއެވެ. އެކަން ވެސް ނުކުރެވެނީ މެޖޯރިޓީ ނެތުމުން ހެއްޔެވެ؟
ވެރިރަށް މާލެއަށް ނިސްބަތްވާ 13 މަޖިލިސް މެންބަރުންގެ ތެރޭގައި ޕީޕީއެމްއަށް ނިސްބަތްވަނީ އެންމެ 4 މެންބަރުންނެވެ. ކައުންސިލަކީ އެމްޑީޕީ މެޖޯރިޓީ ކައުންސިލެކެވެ. އެހެން ނަމަވެސް މާލޭގައި ހިންގާ އެއްވެސް ޕްރޮޖެކްޓެއް ހުއްޓިފައެއް ނެތެވެ. މެގަ ޕްރޮޖެކްޓްތައް ފުލުފުލުގައި ކުރިއަށް އެބަދެއެވެ.
އައްޑޫގައި ތިބި 7 މަޖިލިސް މެންބަރުންގެ ތެރެއިން 5 މެންބަރުން ނިސްބަތްވަނީ އެމްޑީޕީ އަށެވެ. ސަރުކާރަށް ތާޢީދުކުރައްވައިގެން ތިއްބެވީ އެންމެ 2 މެންބަރުންނެވެ. ސަރުކާރުގެ ވެރިން އައްޑޫއަށް ވަޑައިގަންނަވާ ކޮންމެ ފަހަރަކު ވެވަޑައިގަންނަވާ ވަޢުދުތައް ފުއްދާތަނެއް ނުފެނެއެވެ.
ތިލަދުންމަތީގެ ވާހަކަ ދައްކަމާ ހިނގާށެވެ. އެ އަތޮޅަށް ނިސްބަތްވާ 11 މަޖިލިސް މެންބަރުންގެ ތެރެއިން، 8 މެންބަރުންނަކީ، ޕީޕީއެމްގެ މެންބަރުންނެވެ. ސަރުކާރާއި އިދިކޮޅަށް ތިއްބެވީ، އެންމެ 3 މެންބަރުންނެވެ. އެ އަތޮޅު ކައުންސިލަށް ބަލާއިރު، %85 އަކީ ވެސް ސަރުކާރަށް ތާޢީދު ކުރައްވާ ކައުންސިލަރުންނެވެ. އެއީ ސާފު މެޖޯރިޓީއެކެވެ. ތިލަދުންމަތީގައި މިހާތަނަށް އެއްވެސް މެގަ ޕްރޮޖެކްޓެއް ނުފެށެއެވެ.
ސަރުކާރަށް ތަރައްޤީގެ ޕްރޮޖެކްޓް ހިންގަން މެޖޯރިޓީ އެހާ މުހިއްމު ނަމަ ތިލަދުންމަތީގައި މެގަ ޕްރޮޖެކްޓް ތަކެއް ނުފަށަންވީ ކީއްވެ ހެއްޔެވެ؟
ބަޖެޓްގައި އެއްވެސް ތާށި ކަމެއް ނެތި ސަރުކާރުން މާލޭގައި ޕްރޮޖެކްޓްތައް ހިންގަމުން ގެންދާއިރު، އަތޮޅު ތެރޭގައި މެގަ ޕްރޮޖެކްޓެއް ނުފެށިގެން އުޅެނީ މެޖޯރިޓީ ނުލިބިގެންނެއް ނޫނެވެ. ސަރުކާރުގެ ވެރިން މެޖޯރިޓީ މުހިއްމު ކަމަށް ބުނެ ކިތަންމެ ލަވައެއް ވިދާޅުވިޔަސް، ހަގީގަތަކީ، ސަރުކާރުގެ ސިޔާސަތުގައި މެޖޯރިޓީ މުހިއްމު ނޫން ކަމެވެ. ސަރުކާރުގެ ސިޔާސަތުގައި އޮތީ "މާލެ ޕްރައިއޯރިޓީ" އެކެވެ.