ދިވެހިރާއްޖޭގެ ސިވިލް ސާވިސް މުވައްޒަފުން މޫނު ބުރުގާ އަޅައިގެން މަސައްކަތަށް ނިކުތުން މަނާ ކުރާ ޤަވާއިދުގެ މައްސަލައިގައި ދިވެހިރާއްޖޭގެ ދީނީ ޢިލްމުވެރިން ގެންދަވަނީ ކަންބޮޑުވުން ފާޅުކުރަމުންނެވެ. ސިވިލް ސާވިސްގެ ޤަވާއިދު ބާތިލް ކަމަށާއި އެ ޤަވާއިދު އިސްލާޙް ކުރުމަށް ދައުލަތުގެ މުއައްސަސާތަކަށް ޢިލްމުވެރިން ގެންދަވަނީ ގޮވާލައްވަމުންނެވެ.
އއ. މަތިވެރި ސްކޫލްގައި މަސައްކަތް ކުރައްވާ އުޚްތަކު، ކިޔަވިއިދިނުމަށް ދާއިރު މޫނު ބުރުގާ ނޭޅުމަށް އެޑިއުކޭޝަން މިނިސްޓްރީ އިން އަންގާފައިވާ މައްސަލައިގައި މިނިސްޓްރީ އޮފް އިސްލާމިކް އެފެއާޒްގެ ފަރާތުން ވަކި އެއްޗެއް ހާމަކޮށްފައެއް ނުވެއެވެ.
'އައްޑޫލައިވް' އިން ކުރި ސުވާލަކަށް ޖަވާބު ދެއްވަމުން، އިސްލާމިކް މިނިސްޓްރީގެ މީޑިޔާ އޮފިޝަލް އަހްސަން ވިދާޅުވީ އެ މައްސަލަ މިހާތަނަށް އެއްވެސް ފަރާތަކުން އެ ވުޒާރާއަށް ހުށަހަޅާފައި ނުވާ ކަމަށެވެ.
" ވިދާޅުވި މައްސަލަ (މޫނު ބުރުގާ އަޅައިގެން ސްކޫލަށް ކިޔަވައިދޭން ނުދިއުމަށް އއ.މަތިވަރި ސްކޫލް ޓީޗަރަކަށް އެންގުން ) އެއްވެސް ފަރާތަކުން މިނިސްޓްރީއަށް ހުށަހަޅާފައި ނެތް ވާހަކަ ދަންނަވަން. އެޑިއުކޭޝަން މިނިސްޓްރީގެ ބަހެއް ހޯއްދެވުން ރަނގަޅު ކަމަށް ފެންނަ ވާހަކަ ވެސް ދަންނަވަން."
އިސްލާމިކް މިނިސްޓްރީގެ މަސައްކަތުގެ ތެރޭގައި ތަޢުލީމީ ދާއިރާއާގުޅިފައިވާ ދީނީ ކަންކަމުގައި މިނިސްޓްރީ އޮފް އެޑިޔުކޭޝަނަށް ލަފާދިނުމާއި، ކިޔަވާ ކުދިންގެ މެދުގައި ދީނީ ވަޙުދަތު ހިފެހެއްޓުމާއި ދީނީ ހޭލުންތެރިކަން އިތުރުކުރުމަށް މިނިސްޓްރީ އޮފް އެޑިޔުކޭޝަނާ ގުޅިގެން ޕްރޮގްރާމުތައް ހިންގުން ހިމެނެއެވެ.
ރާއްޖޭގެ ބައެއް ޢިލްމުވެރިންގެ ބަސް.
ދިވެހިރާއްޖޭގައި ތިއްބެވި ފުންނާބު އުސް ދީނީ ޢިލްމުވެރިން ގެންދަވަނީ، މޫނު ބުރުގާ އަޅާއިގެން ވަޒީފާތަކަށް ދިއުމުގެ ޙައްޤު އުޚްތުންނަށް ލިބިގެންވާ ކަމަށް ވިދާޅުވެ، އއ. މަތިވެރި ސްކޫލްގެ ޓީޗަރަކަށް އެޑިއުކޭޝަން މިނިސްޓްރީ އިން ދިން އިންޒާރު ކުށްވެރިކޮށްފައެވެ.
ޑރ. އިޔާޟް އަބްދުއްލަތީފް
"އިސްލާމީ ޝަރީޢަތާއި ޚިލާފް އެއްވެސް ޤާނޫނެއް އަދި ޤަވާއިދެއް ނުހެދޭނެ ކަމަށް ރާއްޖޭގެ ޤާނޫނު އަސާސީ ވެސް ބުނޭ. އެހެން ކަމުން ސިވިލް ސާވިސްގެ ޤަވާއިދަކީ ބާތިލް އެއްޗެއް. (…)އައުރަ ނިވާ ނުކޮށް ހެދުން ތުރުކުރައްވައިގެން އޮފީސްތަކަށް ވަޑައިގަންނަވާ އިރުގައި ވެސް މައްސަލައަކަށް ނުވެފައި، ނިވާ ކޮށްގެން ދާ ޓީޗަރ އަށް ހުރަސް އެޅުމަކީ ބޮޑު މައްސަލަ އެއް. އެއީ މި ސަރުކާރުގެ ލާދީނީ ކަމުން ވާ ގޮތް."
މަޖިލިސް މެންބަރ އަލްއުސްތާޛާ އަނާރާ ނަޢީމް
" "ބައެއް ދީނީ ޢިލްމުވެރިންގެ ނަޒަރުގައި އަންހެން ކަނބަލުންނަށް އެންމެ ރަގަޅު ގޮތަކީ، މޫނު ބުރުގާ އެޅުން" އަނާރާ ނަޢީމް ކުރެއްވި ޓްވީޓެއްގައި ވެއެވެ. އެ ޓްވީޓާއި އެކު އަނާރާ ވަނީ އެކަމުގެ ދަލީލު ވެސް ގެންނަވާފައެވެ.
Baeh dheenee ilmuveringe nazaruga anhen kanbalunnah enme rangalhugothakee moonu buruga elhumeve. Dhaleelu pic.twitter.com/X2zit4PsuV
— Anara Naeem (@AnaraNaeem) January 30, 2017
ޝެއިޚް އަލީ ޒައިދު
ކަމާއި ބެހޭ ފަރާތްތަކުން މޫނު ބުރުގާ އަށް ހުރަސް ނާޅުއްވައި، އެއީ އަންހެނުންގެ ޙައްޤެއް ކަމުގައި ރިޢާޔަތް ކޮށް، އެކަމަށް ހުރަސް އަޅާ ޤަވާއިދެއް ހުރި ނަމަ އެ ބާތިލް ކުރުމަށް ގޮވައިލަން. ތިޔަ ޤަވާއިދު އަށް ތިބޭފުޅުންގެ ސިކުނޑިތަކުން ދީނަށް ﷲގެ ޙަޟްރަތުން ފަރަޙް އެނގިލައްވާތޯ
ޝެއިޚް ޝަފީޢު ޢަބްދުﷲ
"މޫނު ބުރުގާ އެޅި އުޚްތުންގެ ހައްޤުގައި ސިވިލް ސާވިސް ކޮމިޝަން އަށް ގޮވާލަން، މިހާރުން ހައްދަވައިގެން ތިޔަ އުޅުއްވާ އެ އުޚްތުންގެ ޢިއްޒަތާއި ކަރާމަތަށް އުނިކަން ލިބޭ ފަދަ ޤަވާއިދު ތަންފީޒު ނުކުރައްވާ. ރާއްޖެ އަކީ މުސްލިމް ޤައުމަކަށް ވެފައި މޫނު ބުރުގާ އަޅައިގެން ވަޒީފާ އަދާކުރުމަކީ މުސްތަޙީލު ކަމަކަށް ވެފައި އޮތުމަކީ ރަނގަޅު ގޮތެއް ނޫން. ﷲއަށް ބިރުވެތިވާން ޖެހޭނެ ސިވިލް ސާވިސް ކޮމިޝަން ފަދަ ޒިންމާދާރު ވަޒީފާތަކުގައި ތިއްބެވި ބޭފުޅުން. އުއްމަތުގެ ކަންކަމުގައި ޒިންމާއ ކޮނޑުގައި އެޅުނީމަ އެކަމަށް ވީ ވަރަކުން ﷲ ރުއްސަވާ ގޮތެއްގައި އަދާކުރެވޭތޯ ބަލަން ވާނެ. އެހެން ނޫނީ އެ އިލާހުގެ ކޯފާ ޙައްޤުވާ ބައެއް ކަމުގައި ވެދާނެ. ދުނިޔޭގެ މުސްލިމް އެހެން ޤައުމުތަކަށް ބަލާލިޔަސް މޫނު ބުރުގާ އަޅައިގެން އުޅޭ އުޚްތުން ވަރަށް އުޖާލާ ކަމާއި އެކު ވަޒީފާ އަދާކުރަމުންދޭ މޫނު ބުރުގާ އަކީ އުޚްތުންގެ ޚިދުމަތުގެ ހުރަހަކަށް ވެގެން ގޮސްފައެއް ނުވޭ. ﷲއަށް ބިރުވެތިވުމަށް ގޮވާލަން ބިރުވެތިވުމުގައި ހުރިހާ އިސްލާޙެއްގެ ފެށުން"
ދީނީ ޢިލްމުވެރިންގެ އިތުރުން ސޯޝަލް މީޑިޔާގައި ގިނަ އަދަދެއް މޫނު ބުރުގާ އެޅުމަކީ، އަންހެން ކަނބަލުންނަށް ލިބިފައިވާ ޙައްޤެއް ކަމަށާއި އެކަން މަނާ ނުކުރެވޭނެ ކަމަށް ބުނެ ނުރުހުން ފާޅު ކުރަމުން ދާއިރު، މިނިސްޓްރީ އަށް މައްސަލަ ހުށަނާޅާ ކަމަށް ބުނެ އިސްލާމިކް މިނިސްޓްރީ އިން އުޒުރު ދެއްކުމަކީ ބަލައި ގަނެވޭނެ ކަމެއް ނޫނެވެ.