1. ކެފެއިން
ކޮންމެވެސް ވަރަކަށް ކެފެއިން ހުންނަ އެއްޗެހި ކެއުމަކީ ގޯސް ކަމެއް ނޫނެވެ. އެހެންނަމަވެސް ކެފެއިން ބޭނުންކުރާނަމަ، އޭގެ އަސަރު ދަރިފުޅަށް ކުރާނެއެވެ. ތުއްތު ކުދިންގެ ހަށިގަނޑަކީ ކެފެއިން ޕްރޮސެސް ކުރުމަށް ތައްޔާރުވެފައިވާ އެއްޗެއް ނޫނެވެ. އެހެންކަމުން ކެފެއިން ހުންނަ އެއްޗެހި ކައިގެން ނުވަތަ ބޮއެގެން ގާތުން ކިރު ދޭނަމަ، ދަރިފުޅުގެ ނިދުމަށް ބަދަލުތަކެއް އައިސް، ނިދާލެއް ލަސްވާނެއެވެ. އެހެންކަމުން ކޮފީ ބޯން ބޭނުންނަމަ، ދަރިފުޅު ނިދަންދެން މަޑު ކޮށްލާށެވެ.
2. ކަނޑު މަސް
މުޅިން އެއްކޮށް ކަނޑު މަސް ކެއުން ހުއްޓާލަން ނުޖެހުނަސް، ބައެއް ވައްތަރުގެ ސީފުޑް ކެއުމަކީ ރަނގަޅު ކަމެއް ނޫނެވެ. އެގޮތުން ބައެއް މަސްމަހުގައި ވަރަށް ގިނަ އަދަދަކަށް މާކިއުރީ ހިމެނިގެން ވެއެވެ. މާކިއުރީ އަކީ އިންސާނުންނަށް ވިހަ އެއްޗެކެވެ.
3. ޗޮކްލެޓް
ޗޮކްލެޓަކީވެސް ކެފެއިން ހުންނަ އެއްޗެކެވެ. ގާތުން ކިރުދޭ ބައެއް މަންމައިން ބުނާ ގޮތުގައި ޗޮކްލެޓް ގާތުން ކިރުދޭ ދުވަސްވަރު ޗޮކްލެޓް ކާނަމަ، ދަރިފުޅު މާގިނައިން ފާހަނައަށް ދާގޮތް ވާކަމަށެވެ.
4. ޕާސްލީ އާއި ޕެޕާމިންޓް
ޕާސްލީ އަކީ ކާއެއްޗެހި ޒީނަތްތެރި ކުރުމަށް ބޭނުންކުރާ އެއްޗަކަށް ވީއިރު، ޕެޕާމިންޓް އަކީ އާންމުކޮށް ސައި ތައްޔާރު ކުރުމުގައި ބޭނުންކުރާ އެއްޗެކެވެ. އެހެންނަމަވެސް މިދެވައްތަރުގެ ފަތަކީވެސް ކިރު އުފައްދައިދޭ މިންވަރު މަދު ކޮށްދޭ އެއްޗެހިއެވެ.
5. ޑެއިރީ
ޑެއިރީ ޕްރޮޑަކްޓް ތަކަކީ ގާތުން ކިރު ބޯ ކުދިންނަށް ވަރަށް ގިނަ ދަތިތައް ކުރިމަތި ކުރުވާ އެއްޗެހިއެވެ. އެގޮތުން ބައެއް ކުދިންނަށް އެކްޒީމާ، އެހެނިހެން ހަމުގެ މައްސަލަތައް އަދި ނިދުމުގައިވެސް ދަތިތަކާއި ކުރިމަތި ވެއެވެ. އެފަދަ އެއްވެސް ކަމެއް ދަރިފުޅުގެ ކިބައިން ފެންނަނަމަ، ޑެއިރީ އުފެއްދުންތައް ބޭނުން ކުރުން ހުއްޓާލާށެވެ. އެއީ ދަރިފުޅު ޑެއިރީ ޕްރޮޑަކްޓް ތަކަށް އެލާޖިކް ވަނީކަމަށް ވެދާނެތީއެވެ.
6. ސިޓްރަސް
ދަރިފުޅު ތުއްތުއިރު ދަރިފުޅުގެ ގޭސްޓްރޯއިންޓެސްޓިނަލް (ޖީއައި) ޓްރެކްޓްވެސް ވަރަށް ޅަވާނެއެވެ. އެހެންކަމުން ސިޓްރަސް ނުވަތަ ހުތް މޭވާތަކުގައި ހުންނަ ބައެއް މާއްދާތަކުގެ ސަބަބުން ޖީއައި ޓްރެކްޓް އަށް އުނދަގޫތައް ކުރިމަތި ވެދާނެއެވެ. ސިޓްރަސް މޭވާތައް ކެއުމުގެ ސަބަބުން ދަރިފުޅު ހޮޑުލާ ގޮތްވެސް ވެއެވެ. އަދި ހަމަ އެހެންމެ ނެޕީ ޖަހާފައި ހުންނައިރު ހަށިގަނޑުގައި ރޭޝް އުފެދޭ ގޮތްވެސް ވެއެވެ.
7. ޕީނަޓް
އާއިލާގައި ޕީނަޓް އަށް އެލާޖިކް ވާ މީހަކު ހުރިނަމަ، ގާތުން ކިރުދޭ ދުވަސްވަރު ޕީނަޓް ކެއުމާއި ދުރުހެލި ވާށެވެ. ޕީނަޓްފަދަ ނަޓްސްގައި ހުންނަ އެލާޖިކް މާއްދާތައް ކިރުގެ ޒަރިއްޔާއިން ދަރިފުޅަށް ފޯރުން އެކަށީގެން ވެއެވެ. ދަރިފުޅު ޕީނަޓް އަށް އެލާޖިކް ވާކަން ޔަޤީން ނުވަނީނަމަ، ނޭވާލާން އުނދަގޫވުން ނުވަތަ ހަމުގައި ރޭޝް ހުރިތޯ ބަލާށެވެ. އެއީ އެލާޖިކް ރިއެކްޝަންގެ ބައެއް އަލާމާތްތަކެވެ.
8. ލޮނުމެދު
ލޮނުމެދުގައި ހުންނަ ވަހުގެ އަސަރު ކިރަށްވެސް ކުރާނެއެވެ. އެއީ އެހާ ފަސޭހަ ވަހަކަށް ނުވުމުން، ދަރިފުޅުވެސް އެވަސް ޖެހުމުން ކިރު ބޯން ޖެހިލުންވާނެއެވެ. އެހެންކަމުން ގާތުން ކިރުދޭ ދުވަސްވަރު ލޮނުމެދު އެހާގިނައިން ނުކާށެވެ.