ދިވެހިރާއްޖޭގައި އެންމެ ގިނައިން ދެކެވޭ އެއް ވާހަކައަކީ، މުސާރައިގެ ފަރަޤު ބޮޑު ވުމުގެ ވާހަކައެވެ. ކުރާ މަސައްކަތާއި އެކަށީގެންވާ މުސާރައެއް ނުލިބޭ ކަމުގެ ޝަކުވާ ގިނަ ސިވިލް ސާވެންޓުން ކުރެއެވެ.
މިއީ، ވެސް މުސާރައިގެ ފަރަޤުގެ ވާހަކައެކެވެ. ކުޅިވަރާއި ބެހޭ ޤާނޫނެއް އެކުލަވާލައި އެ ޤާނޫނުގެ ދަށުން ސްޕޯޓްސް ކޮމިޝަނެއް ރައީސުލްޖުމްހޫރިއްޔާ މިވަނީ އުފައްދަވާފައެވެ. އެކޮމިޝަނާއި ބެހޭގޮތުން އެންމެ ފާހަގަކޮށްލެވޭ އެއްކަމަކީ، މުސާރައެވެ. ދައުލަތުގެ އެހެން ވުޒާރާތަކާއި ބަލާއިރު ވަކިން ޚާއްސަ ގޮތެއްގައި، ސިވިލް ސާވެންޓުންގެ ސްޕޯޓްސް ކޮމިޝަނަރގެ އޮފީހުގެ މުވައްޒަފުންގެ މުސާރަ ބޮޑެވެ.
މޯލްޑިވްސް ސްޕޯޓްސް ކޯޕަރޭޝަން ލިމިޓެޑްގެ އެޑްމިން އޮފިސަރެއްގެ އަސާސީ މުސާރަ 8500 ރުފިޔާ ލިބެއެވެ. މީގެ އިތުރުން ލިވިން އެލަވެންސްގެ ގޮތުގައި 3000 ރުފިޔާ އަދި އެޓަންޑެންސް އެލަވެންސްގެ ގޮތުގައި 3000 ރުފިޔާ ލިބެއެވެ.
ދެން ދިވެހިރާއްޖޭގެ މިސްކިތްތަކުގެ އިމާމުންގެ މުސާރައަށް ޖެހިލަމާ ހިނގާށެވެ. އިމާމް ކަމުގެ ވަޒީފާގެ އެންމެ މަތީ ލެވެލް ކަމުގައިވާ އެމްއެސް 3 ގެ މުވައްޒަފެއްގެ އަސާސީ މުސާރައަކީ، 7035 ރުފިޔާއެވެ. ސާވިސް އެލަވެންސްގެ ގޮތުގައި ލިބޭ 2000 ރުފިޔާ އާއި އެކު ޖުމްލަ 9035 ރުފިޔާއެވެ.
އަޅުގަނޑަށް ދޭހަވި މާނައަކީ، ކުޅިވަރަށް ދޭ އަހަންމިއްޔަތު ބޮޑު ކަމެވެ. ތިބޭފުޅުންނަށް ދޭހަވީ ކޮން މާނައެއް ހެއްޔެވެ؟