1. ޑާކް ޗޮކްލެޓްގައި ވަރަށް ގިނަ އަދަދަކަށް ތިއޯބްރޮމައިން އެކުލެވިގެން ވެއެވެ. ތިއޯބްރޮމައިން އަކީ މަސްތައް ރިލޭކްސް ކުރުމުގައި އެހީތެރިވެދީ ލޭހޮޅިތައް ޑައިލޭޓް ކޮށްދޭ މާއްދާއެކެވެ. އަދި ހަމަ އެހެންމެ މިކެމިކަލް އަކީ ހިތް ސްޓިމިއުލޭޓް ކޮށް، އިތުރަށް ކުރާ މަސައްކަތަށް އެކަށީގެންވާ ވަރަށް ހަކަތަ ލިއްބައިދޭ މާއްދާއެއްވެސް މެއެވެ.
2. މޮނޮއަންސެޗުރޭޓެޑް ފެޓްސް އަކީ ސިއްހަތަށް ފައިދާހުރި އެއްޗެކެވެ. އެހެންނަމަވެސް އެއީ ވަކި މިންވަރަކަށް ކޮންޓްރޯލް ކޮށްގެން ކާ ނަމައެވެ. ޗޮކްލެޓްގައި ހުންނަ އޯލެއިކް އެސިޑް ނަމަކަށް ކިޔާ މޮނޮއަންސެޗުރޭޓެޑް ފެޓް އަކީ ޒައިތޫނި ތެލުގައިވެސް ހުންނަ އެއްޗެކެވެ. އެހެންކަމުން ކުޑަކޮށް ޗޮކްލެޓް ކެއުމަކީ ރަނގަޅު ކަމެކެވެ.
3. ޑާކް ޗޮކްލެޓް ކެއުމުން ޕްރިއެކްލެމްޕްސިއާ (ދުވަސް ނުފުރާ ވިހެއުން) އިން ރައްކާތެރި ކޮށްދެއެވެ. ޕްރިއެކްލެމްޕްސިއާގައި ވާގޮތަކީ މާ އަވަސް އަވަހަށް ބްލަޑް ޕްރެޝާ މައްޗަށް ގޮސް، އަވަހަށް ވިހެއުމަށް މެދުވެރި ވަނީއެވެ. އެނޫންވެސް އެހެނިހެން ސިއްޙީ ގެއްލުންތައް އޭގެ ސަބަބުން ލިބެއެވެ. އަދި ބައެއް ފަހަރަށް އޭގެ ސަބަބުން މީހާގެ ފުރާނަ ގެއްލޭ ގޮތްވެސް ވެއެވެ. އެހެންނަމަވެސް ޔޭލް ޔުނިވާސިޓީގެ ދިރާސާވެރިން ހޯދާފައިވާ ގޮތުން މާބަނޑު ދުވަސްވަރު ގިނައިން ޗޮކްލެޓް ކާ އަންހެނުންގެ އަމްބިލިކަލް ކޯޑް (ފޫޅު) ބްލަޑް ގައި ތިއޯބްރޮމިން ގިނައިން ހުރުމުގެ ސަބަބުން ޕްރިއެކްލެމްޕްސިއާ މެދުވެރިވުމަކީ ވަރަށް ނާދިރު ކަމެކެވެ.
4. ޗޮކްލެޓްގައި ހުންނަ ފްލޭވޮނޮއިޑްގައި އެންޓިއޮކްސިޑެންޓްސް ހުރެއެވެ. އެއީ ދިފާޢީ ބާރު އިތުރު ކޮށްދޭ އެއްޗެކެވެ. އަދި ހަމަ އެއާއިއެކު ފްލޭވޮނޮއިޑް އަކީ ކާޑިއޯވެސްކިއުލާ (ހިތުގެ) ނިޒާމް ރަނގަޅު ގޮތުގައި މަސައްކަތް ކުރުމަށް އެހީތެރިވެދޭ އެއްޗެކެވެ. ބާރުގަދަ ފްލޭވޮނޮއިޑްގެ އިތުރުން ޗޮކްލެޓްގައި އަޔަން އާއި މެގްނީސިއަމް ފަދަ އެހެނިހެން ނިއުޓްރިއެންޓްތައްވެސް ހިމެނިގެން ވެއެވެ.
5. މާބަނޑު ދުވަސްވަރު ބަރުދަން އިތުރު ވުމަކީ ބަނޑުގައިވާ ދަރިފުޅަށް ރަނގަޅު ކަމަކަށް ވީނަމަވެސް، މާބޮޑަށް ބަރު ވުމަކީ ރަނގަޅު ކަމެއް ނޫނެވެ. އެހެންކަމުން ޗޮކްލެޓަކީ ބަރުދަން ކޮންޓްރޯލް ކުރުމުގައި އެހީތެރިވެދޭ އެއްޗެކެވެ. އެގޮތުން ފެޓް އާއި ހަކުރު މާގިނައިން ނުހުންނަ ޗޮކްލެޓް ކެއުމަކީ މާބަނޑު އަންހެނުންގެ ބަރުދަން ކޮންޓްރޯލް ކުރުމުގައި ފަސޭހަ ކޮށްދޭ ކަމެކެވެ. އެހެންނަމަވެސް މީހާ މާބޮޑަށް ބަރުވުމަކީ އަމިއްލަ ނަފްސަށާއި ދަރިފުޅަށްވެސް އޭގެ ނޭދެވޭ އަސަރު ކުރާނެ ކަމެކެވެ.
6. މާބަނޑު ދުވަސްވަރު މީހާގެ ސްޓްރެސް ލެވެލް މައްޗަށް ދިއުމަކީ އެކަށީގެންވާ ކަމެކެވެ. އެއީ ހަށިގަނޑުގެ ހޯމޯންސް ތަކަށް އަންނަ ބަދަލެއްގެ ސަބަބުންނެވެ. އެހެންކަމުން ރަނގަޅު ނިއުޓްރީޝަން ލިއްބައިދޭ އެއްޗެހި ކެއުމަކީ މުހިންމު ކަމަކަށް ވީއިރު، މަދުން ނަމަވެސް ޗޮކްލެޓް ކެއުމަކީ ސްޓްރެސް ލުއި ކޮށްދޭ ކަމެކެވެ.
7. ޗޮކްލެޓްގައި ސެރޮޓޮނިން ހިމެނިގެން ވެއެވެ. އެއީ މާބޮޑަށް މާޔޫސްވެފައި ހުންނަ ވަގުތުތަކުގައި މީހާގެ މޫޑް ރަނގަޅު ކޮށްދިނުމުގައި އެހީވެދޭ އެންޓިޑިޕްރެސެންޓް އެކެވެ.
ޑާކް ޗޮކްލެޓް އަކީ ރަނގަޅު ބެލެންސްޑް ޑައިޓެއްގައި އުޅޭ މީހަކަށް ރަނގަޅު އެއްޗެކެވެ. އެހެންނަމަވެސް ޖެސްޓޭޝަނަލް ޑައިބެޓީސް ނުވަތަ އިތުރު މައްސަލަތައް ހުންނަ ކަމަށް ވާނަމަ، ކެއުމަށް އެއްވެސް ކަހަލަ ބަދަލެއް ގެނައުމުގެ ކުރިން ޑޮކްޓަރުގެ ލަފާ ހޯއްދަވާށެވެ.