އައްޑޫ ސިޓީ، ލިންކް ރޯޑްގައި ހިނގި އެކްސިޑެންޓެއްގައި ދެ އަންހެނަކަށް އަނިޔާވެއްޖެއެވެ.
'އައްޑޫލައިވް' އަށް މައުލޫމާތު ލިބިފައިވާ ގޮތުގައި ރުއްޖެހެރަ ސަރަހައްދުގައި ހިނގި މި އެކްސިޑެންޓް އަނިޔާވެފައި ވަނީ ސައިކަލް ދުއްވަން ތިބި 2 އަންހެނުންނަށެވެ.
މި އެކްސިޑެންޓް ހިނގާފައި ވަނީ، މަރަދޫ އިން ހިތަދޫ އާއި ވީކޮޅަށް ދުއްވާފައި އައި ސައިކަލްގެ ފަހަތުގައި އިން އަންހެން މީހާގެ ހެދުން ފުރޮޅުގައި އޮޅުމުގެ ސަބަބުން ސައިކަލްގައި ތިބި ދެމީހުން ވެއްޓި ގެންނެވެ.
އެކްސިޑެންޓްގައި އަނިޔާ ލިބުނު ދެ އަންހެނުންނަށް ވެސް ހިތަދޫ ރީޖަނަލް ހޮސްޕިޓަލުގައި މިވަގުތު ދަނީ ފަރުވާދެމުންނެވެ.
ހިތަދޫ ރީޖަނަލް ހޮސްޕިޓަލްގެ އޮފިޝަލަކު ވިދާޅުވި ގޮތުގައި އެކްސިޑެންޓްގައި އަނިޔާވި ދެ އަންހެނުންގެ ވެސް ބޯ ފަޅައިގެން ގޮސްފައިވާ ކަމަށާއި މިހާރު އެކްސްރޭ ނަގައި އިތުރަށް ބަލަމުން ގެންދާ ކަމަށެވެ.
"އިތުރަށް ބަލަން ޖެހޭ ބެލުންތައް މިދަނީ ބަލަމުން އެއަށް ފަހު އެމީހުންނަށް ލިބުނު އަނިޔާތަކުގެ ތަފްސީލެއް ބުނަން އެނގޭނީ. އެހާ ސީރިއަސް އެއް ނޫން" ހޮސްޕިޓަލްގެ އޮފިޝަލަކު ވިދާޅުވިއެވެ.