ދެހާސް ފަނަރަ ވަނަ އަހަރު ރިލީޒްކޮށް، ބޮޑު ކާމިޔާބީއެއް ހޯދި "އެންއެޗް 10" އަށް ފަހު ބަތަލާ އަނުޝްކާ ޝަރްމާ ޕްރޮޑިއުސްކޮށް، އެކްޓްކޮށްފައިވާ ފިލްމް "ފިއްލޯރީ" ގެ ފުރަތަމަ ޓްރެއިލާ ދައްކާލައިފި އެވެ.
މި ފިލްމުގައި އަނުޝްކާއާ އެކު ބަތަލެއްގެ ގޮތުގައި ފެނިގެން ދާނީ "އުޅުތާ ޕަންޖާބް" އިން ވިދާލި ޕަންޖާބީ އެކްޓަރު ދިލްޖިތު ދޮސަންޖެވެ.
މީގެ އިތުރުން ފިލްމުގެ މުހިއްމު ރޯލަކުން "ލައިފް އޮފް ޕައި" ގެ ބަތަލު ސޫރަޖް ޝަރްމާ ވެސް ފެނިގެން ދާނެ އެވެ.
ލޯބީގެ ތަފާތު ހާދިސާތަކެއް ދައްކުވައިދޭ "ފިއްލޯރީ" ޑައިރެކްޓްކޮށްފައި ވަނީ އަންޝާއީ ލާލް އެވެ. ފިލްމް ސިނަމާތަކަށް އަންނާނީ އަންނަ މަހުގެ 24 ގަ އެވެ.
"ފިއްލޯރީ" ގެ ޓްރެއިލާ ގިނަ ބަޔަކަށް ކަމުގޮސްފައިވާ އިރު، ބައެއް މީހުން ބުނެފައި ވަނީ އަނުޝްކާ ރޫހެއްގެ ގޮތުގައި ބައެއް މަންޒަރުތަކުން ފެންނާތީ، މި ފިލްމްގައި ޝާހްރުކް ހާނާއި ރާނީ މުކަރްޖީ 2005 ގައި ކުޅުނު "ޕަހޭލީ" އާ އެއްގޮތް ކަހަލަ ކަންތައްތަކެއް ހުރި ކަމަށް ބެލެވޭ ކަމަށެވެ.
"ފިއްލޯރީ" އާ އެއްގޮތަށް ރަށްފުށުގެ ދިރިއުޅުން ދައްކުވައިދޭ އެ ފިލްމުގައި ޝާހްރުކްގެ ރޫހެއް އައިސް، ރާނީއާ އެކު އުޅެ އެވެ.