އައްޑޫ މޭޔަރު އަބްދުﷲ ސޯދިގް (ސޯބެ) ގެ މައްޗަށް މަގާމުގެ ނުފޫޒު ބޭނުންކޮށްގެން ނާޖާއީޒު ފައިދާއެެއް ހޯދައި ދިން ކަމަށް ބުނެ ދައުވާ ކުރަނީ ކުރިއަށް އޮތް ލޯކަލް ކައުންސިލް އިންތިހާބުގައި ވާދަ ކުރައްވާތީ، ކެންޑިޑެސީ ބާތިލްކޮށްލުމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ސޯބެގެ މައްޗަށް ކުރާ ދައުވާގެ ޝަރީއަތް އިއްޔެ ހިތަދޫ މެޖިސްޓްރޭޓް ކޯޓްގައި ފަށާފައި ވަނިކޮށް، ނަޝީދު މިއަދު ކުރެއްވި ޓްވީޓެއްގައި ވިދާޅުވީ، އެ ދައުވާއަކީ ކެންޑިޑެސީ ބާތިލް ކުރަން ކުރާ ހީލަތްތެރި ދައުވާއެއް ކަމަށެވެ.
ސޯބެއަކީ ތިން ވަނަ ދައުރަކަށް ހިތަދޫ އުތުރު ދާއިރާ އަށް ވާދަ ކުރައްވަން އެމްޑީޕީގެ ޓިކެޓް ލިބިވަޑައިގެންފައިވާ ކެންޑިޑޭޓެވެ.
Condemn resumption of trial against the Mayor of Addu City @SobeAbdulla. This is a cowardly attempt to disqualify his #LCE2017 candidacy.
— Mohamed Nasheed (@MohamedNasheed) February 7, 2017
ސޯބެގެ މައްޗަށް ކުރާ ދައުވާގެ ފުރަތަމަ އަޑު އެހުން އިއްޔެ ބޭއްވި އިރު، އޭނާ ވަނީ ދައުވާ އަށް އިންކާރު ކުރައްވައިފަ އެވެ. އަދި ވަކީލަކު ހަޖަމައްސަން 14 ދުވަހުގެ މުއްދަތެއް ދެއްވުމަށް ވެސް ޝަރީއަތުގެ މަޖިލީހުގައި އެދިވަޑައިގެންފަ އެވެ.
ސޯބެ އިއްޔެ ނޫސްވެރިންނަށް ވެސް ވިދާޅުވީ އޭނާގެ މައްޗަށް ކުރާ ދައުވާއަކީ އަސްލެއް ނެތް، ސިޔާސީ ދައުވާއެއް ކަމަށެވެ. އަދި މި ދައުވާގެ ބޭނުމަކީ އޭނާއަކީ ކޮރަޕްޓް މީހެއްކަން ދެއްކުން ކަމަށް ވިދާޅުވި އެވެ.