ފޮޓޯ އިން އެ ފެންނަނީ ފޭދޫ ލިންކް ރޯޑްގެ މެދުގައި ގަހެއް ފަޅާފައި ހުއްޓަ އެވެ. ނޫނެކެވެ. ގަހެއް ފަޅާފައި ހުރީކީ ނޫނެވެ. މަގުގެ މެދުގައި ވަޅުގަނޑެއް އިނުމުން، އެކަން ފާހަގަ ކުރުމުގެ ގޮތުން ގޮފިގަނޑެއް ޖަހާފައި އިނީ އެވެ. ސަޅި ދޯ އެވެ؟
ސަޅިއޭ ބުނެ ޖޯކަކަށް ހެދުމަށް ވުރެ، އަސްލު މިކަން ސީރިއަސް އެވެ. މިއީ އެތައް ބައެއްގެ ފުރާނައާ ގުޅިފައި އޮތް މައްސަލައެކެވެ. މަގުގެ ހާލަތު ހަމަ ދަށީ އެވެ. ވަޅުގަނޑުތައް އެހާ ގިނަ އެވެ.
މިއީ އަބަދު ވެސް އައްޑޫ ލިންކްގެ ރޯޑްގެ ހާލަތެވެ. މަގުގެ އެކި ހިސާބުތަކުގައި ވަޅުގަނޑުތައް ހެދި، މަގު ބޭނުން ކުރަން ވަރަށް ދައްޗެވެ.
މީގައިި އަދި އެންމެ ނުރައްކާތެރި އެއް ކަމަކީ މަގުގައި ވަޅުގަނޑުތައް ހުރި ބައެއް ސަރަހައްދުތަކުގައި ހުންނަ މަގުބައްތި ވެސް ރޭގަނޑު ނުދިއްލޭ ކަމެވެ.
އަނެއްކޮޅުން ވާރޭ ވެހި ފެން ހެދިއްޖެ ނަމަ، ވަޅުގަނޑުތައް ފުރި، ވަޅުގަނޑުތައް ހުންނަަކަން ވެސް ނޭނގޭ ކަމެވެ. އެހެންވެ މިއީ މަގު ބޭނުން ކުރާ މީހުންނަށް އޮތް ވަރަށް ބޮޑު ނުރައްކަލެވެ.
މީގެ ކުރިން ވެސް މިފަދަ ވަޅުގަނޑުތަކަށް ސައިކަލާ އެކު ބައެއް މީހުން ވެއްޓި ބޮޑެތި އަނިޔާތަކެއް ލިބިފައިވެ އެވެ.
އައްޑޫ ލިންކް ރޯޑްގެ ވާހަކައަކީ ދައްކައި ކޮޅުން ލާނެ ވާހަކައެއް ނޫނެވެ. މަގުގެ ވަޅުގަނޑުތަކުގައި އަބަދު އޮންނަނީ ޕެޗް އަޅަން ޖެހިފަ އެވެ. އެކަން އެމްއާރްޑީސީން މިހާރު ކުރަމުން ގެންދެ އެވެ.
އެކަމަކު އެއީ ފޫނެއް ފަޔަށް ފެންފުރުން ކަހަލަ ކަމެކެވެ. މައްސަލައަކީ މި މަގު ހެދި އިރު، ފެންވަރު ދަށްކޮށް ހެދުމެވެ ނަތީޖާއަކީ އަބަދު މަރާމާތު ކުރުން ނޫން ކަމެއް ނެތުމެވެ.
މަގު ބޭނުން ކުރާ މީހުން ތިބީ ނުރައްކަލަށް ހުށަހެޅިފަ އެވެ. މަހުގެ އެކި ހިސާބުތަކުގައި ވަޅުގަނޑުތައް ގިނަ އެވެ. ހާއްސަކޮށް މިހާރު ފޭދު އާއި މަރަދޫފޭދޫ އަދި މަރަދޫގެ ލިންކް ރޯޑްގައި ވަޅުގަނޑުތައް ގިނަ އެވެ.
އެހެންވެ ދުއްވާ މީހުން ސަމާލުވާށެވެ.