ގައުމީ ބޭންކް އޮފް މޯލްޑިވްސް (ބީއެމްއެލް) ގެ ކޭޝް އެޖެންޓުންގެ ނެޓްވާކާ 200 ވަނަ ކަސްޓަމަރު ގުޅިއްޖެ އެވެ.
ބީއެމްއެލްގެ 200 ވަނަ ކޭޝް އޭޖެންޓަކީ ކ. އަތޮޅު ދިއްފުށީގައި ހިންގަމުންދާ ކުންފުންޏެއްކަމަށްވާ، އެޗްއެސް. ޝެޑޯ އެވެ.
ބީއެމްއެލްއިން ވަނީ ކޭޝް އޭޖެންޓްގެ 200 ވަނަ ކަސްޓަމަރު ފާހަގަކުރުމުގެ ގޮތުން ދިއްފުށީގައި ޚާއްޞަ ޙަފްލާއެއް ބާއްވައިފަ އެވެ.
ކޭޝް އޭޖެންޓަށް ރަމްޒީ ޓޯކަން ޙަވާލުކޮށް ދެއްވީ ބީއެމްއެލްގެ ޑެޕިއުޓީ ސީއީއޯ ޢާއިޝަތު ނޫރުއްދީނެވެ.
ޢާއިޝަތު ވިދާޅުވީ، ބީއެމްއެލްއިން ކޭޝް އޭޖެންޓުން މެދުވެރިކޮށް އަތޮޅުތެރޭގައި ދެމުން އަންނަ ފައިސާ ނެގުމުގެ ޚިދުމަތަކީ ރައްޔިތުން އެ ޚިދުމަތަކަށް ނުހަނު ބޭނުންވެފައިވާ ޚިދުމަތެއްކަ މަށެވެ. އަދި މި ޚިދުމަތުގެ ސަބަބުން ރައްޔިތުންނަށް އިތުރު އުނދަގުލެއް ނެތި ނުވަތަ ބޭންކުގެ ބްރާންޗެއް ހުންނަ ރަށަކަށް ނުގޮސް، ފަސޭހަކަމާއެކު ކޭޝް އެޖެންޓުން މެދުވެރިކޮށް ފައިސާ ނެގޭނޭ ކަމަށް ވިދާޅުވި އެވެ.
ފައިސާ ނެގުމުގެ ޚިދުމަތް ދިނުމަށް ބީއެމްލްގެ ކޭޝް އެޖެންޓުން ހަމަޖައްސަނީ ބޭންކްގެ ބްރާންޗެއް ނުވަތަ އޭޓީއެމް ނުހުންނަ ރަށްރަށުގައި ރީޓެއިލް ވިޔަފާރި ކުރާ ފަރާތްތަކުގެ ތެރެއިންނެވެ.
ބީއެމްއެލްގެ ނުވަތަ އޭޓީއެމްއެއް ނުހުންނަ، މީހުން ދިރިއުޅޭ ހުރިހާ ރަށެއްގައި ކޭޝް އެޖެންޓުން ހަމަޖެއްސުމުގެ މަސައްކަތް ބިއެމްއެލްއިން ފަށާފައިވަނީ 2015 ގައެވެ.