މިދިޔަ ހޮނިހިރު ދުވަހު، ހިތަދޫ ގެއެއްގެ ތެރޭގައި މަރުވެފައި އޮތްވާ ފެނުނު ބަންގުލަދޭޝް މީހާއަކީ ގަވާއިދާއި ހިލާފަށް އުޅެމުން އައި މީހެއްކަމުން އޭނާގެ ހަވާލު ވެރިއެއް ނެތިގެން އެކަން ތަހްގީގް ކުރަމުން އަންނަކަމަށް ފުލުހުން ބުނެފިއެވެ.
ފުލުހުންގެ އައްޑޫ ކޮމާންޑަރ އިންސްޕެކްޓަރ އޮފް ޕޮލިސް ޖަމްޝީދު އަލީ ވިދާޅުވީ އެމީހާގެ ހަށިގަނޑު ހިތަދޫ ހޮސްޕިޓަލްގެ މޯޗަރީގައި ބާއްވާފައިވާ ކަމަށާއި، އެ މައްސަލަ ކަމާއި ބެހޭ ފަރާތްތަކާއި އެކު ތަހްގީގު ކުރަމުން އަންނަ ކަމަށެވެ.
ޝަފީގް ނަމަކަށް ކިޔާ ބަންގްލަދޭޝް މީހާ މަރުވެފައި އޮތްވާ ފެނިގެން ހިތަދޫ ރީޖަނަލް ހޮސްޕިޓަލަށް ގެންގޮސްފައިވަނީ ހޮނިހިރު ދުވަހުގެ މެންދުރުފަހު 3:30 ހާއިރުއެވެ. އޭނާ ހިތަދޫގައި ދިރިއުޅެމުން އައީ ސެކިއުރިޓީ ބަލަހައްޓާ "ސަންރައިޒް ސެކިއުރިޓީ"ގެ މުވައްޒަފުން ދިރިއުޅޭ ތަނެއްގައެވެ. އޭނާ މަރުވެފައި އޮތްވާ ފެނުނީވެސް އެގޭ ތެރެއިންނެވެ.
ޝަފީގް މަރުވެފައިވާކަން އެނގުނީ ހުކުރު ދުވަހުގެ ރޭ ޑިއުޓީގައި ހުރުމަށްފަހު ހޮނިހިރު ދުވަހުގެ ހެނދުނު ނިދި ގޮތަށް މެންދުރު ކާން ނުހޭލުމުން ގޮސް ބެލުމުންނެވެ. ޝަފީގްގެ މައްސަލަ ފުލުހުންނަށް ރިޕޯޓް ކުރީ ހިތަދޫ ރީޖަނަލް ހޮސްޕިޓަލުންނެވެ.
ޝަފީގު ރާއްޖޭގައި ދިރިއުޅެ ގައުމަށް ނުދާތާ 6 އަހަރުވެފައިވާ އިރު އޭނާގެ ދަރިއަކު މާލޭގައި ވަޒީފާ އަދާކުރަމުން އަންނަ ކަމަށް ހިތަދޫގައި ދިރިއުޅޭ ބައެއް ބިދޭސީންގެ ފަރާތުން މައުލޫމާތުވަނީ ލިބިފައެވެ.
މިހާދިސާ އާއި ގުޅޭ ގޮތުން އިމިގްރޭޝަންގެ ބަހެއް ހޯދުމަށް އެތަނުގެ މީޑިއާ އޮފިޝަލަށް ގުޅުމުން ފޯނު ނުނަގާތީ ޖަވާބެއް ވަނީ ލިބޭ ގޮތް ނުވެފައެވެ.