މިދިޔަ ހޮނިހިރު ދުވަހު އައްޑޫ ސްޓޭޑިއަމްގައި ކަރަންޓްގެ މަސައްކަތެއް ކުރަމުން ދަނިކޮށް ކަރަންޓްގައި ޖެހުނު ފެނަކަ ކޯޕަރޭޝަންގެ ސީނިއާ ޓެކްނީޝަން މުހައްމަދު ނާޒިމް (ނާނު) އިތުރު ފަރުވާ އަށް މިއަދު މާލެ ފޮނުވަން ނިންމައިފި އެވެ.
އޭނާ އިތުރު ފަރުވާއަށް މާލެ ފޮނުވާލަން ނިންމާފައި ވަނީ ބޮލަށް ލިބިފައިވާ ގެއްލުމަކަށް ފަރުވާ ދިނުމަށް ކަމަށް އެނގިފައިވެ އެވެ.
ކަރަންޓްގައި ޖެހުމާ ގުޅިގެން ނާނު އަށް އެންމެ ފުރަތަމަ ފަރުވާ ދިނީ ހިތަދޫ ރީޖަނަލް ހޮސްޕިޓަލްގެ އައިސީޔޫގަ އެވެ. އަދި ވޯޑަށް ބަދަލުކޮށްފައިވަނީ އިއްޔެ ހެނދުނު އެވެ.
ވޯޑަށް ބަދަލު ކުރުމަށް ފަހު ހޮސްޕިޓަލުން ބުނީ ނާނުގެ ހާލު "ނޯމަލް" ކަމަށެވެ.
ފެނަކަ ކޯޕަރޭޝަން އައްޑޫގައި މަސައްކަތް ކުރާ ދެ މުވައްޒަފަކު ކަރަންޓްގައި ޖެހުނު އިރު މީގެ ދެއަހަރު ކުރިން ގއ. ވިލިނގިލީގައި ހިނގި ހިތާމަވެރި ހާދިސާއެއްގައި ފެނަކަ ކޯޕަރޭޝަންގެ މުވައްޒަފަކު ވަނީ ކަރަންޓްގައި ޖެހިގެން މަރުވެފަ އެވެ.
މިހާދިސާ ވެސް އަދި ތަހުގީގްކޮށް ނިމިފައެއް ނުވެ އެވެ.