ދިރިއުޅުމުގެ ކަންތައްތައް ވީހާވެސް ރަނގަޅަށް ކުރުމަށްޓަކައި ދުޅަހެޔޮ ސިއްޙަތެއް ހުރުމަކީ ވަރަށް މުހިންމު ކަމެކެވެ. އެގޮތުން ސިކުނޑީގެ ސިއްޙަތަށްޓަކައި ކެއިންބުއިމުގައި ފައިދާހުރި އެއްޗެހި ބޭނުން ކުރުމުގެ އިތުރުން ކަސްރަތު ކުރުމަކީވެސް އެހާ މުހިންމު ކަމެކެވެ. އެހެންނަމަވެސް އުމުރުން ދުވަސްވާ ވަރަކަށް މީހާގެ ހަނދާން ހުރުމުގެ ބާރު ކުޑަވެގެން ދާނެއެވެ. ހަނދާން ވަރުގަދަ ކުރުމަށްޓަކައި ކުރަންވީ ބައެއް ކަންތައްތައް ތިރީގައި އެވަނީއެވެ.
1. ރަނގަޅަށް ނިދުން
ރަނގަޅަށް ނުނިދުމަކީ ސިކުނޑިއަށް ބޭނުންވާ މިންވަރަށް އަރާމް ނުލިބުމަށް ދިމާވާ އެންމެ ބޮޑު އެއް ސަބަބެވެ. މި ކަމަކީ ލަސްލަހުން ނަމަވެސް އަލްޒައިމާސް ބައްޔާއި ގުޅުންހުރި ޕްރޮޓީންތަކެއް ސިކުނޑީގައި ޖަމާވުމަށް މެދުވެރިކޮށްދޭ ކަމެކެވެ. އެހެންކަމުން ސިކުނޑި ދުޅަހެޔޮކޮށް ބެހެއްޓުމަށްޓަކައި ފުރިހަމަ ނިންޏަކީ މުހިންމު އެއްޗެކެވެ.
2. ޕޮލިއުޝަން އިން ދުރުހެލިވުން
2017 ވަނަ އަހަރު ކުރި ދިރާސާއަކުން ދައްކާފައިވާ ގޮތުގައި ސާފު ވައި ލިބޭ ސަރަޙައްދުތަކުގައި އުޅޭ އަންހެނުންނާއި އަޅާބަލާއިރު ބޮޑަށް ވައި ނުސާފުވެފައިވާ ސަރަޙައްދުތަކުގައި އުޅޭ އަންހެނުންނަށް ޑިމެންޝިއާ ޖެހުމުގެ ފުރުސަތު ބޮޑެވެ. ޕޮލިއުޓް ވެފައިވާ މާއްދާތައް ހަށިގަނޑުގެ ތެރެއަށް ވަދެ އިންފްލެމޭޝަންގެ މައްސަލަތައް ކުރިމަތި ކުރުވައެވެ. އޭގެ ސަބަބުން ޒުވާން އުމުރުގައި އަލްޒައިމާސް ޖެހުމުގެ ފުރުސަތު ބޮޑުވެގެން ދެއެވެ.
3. ރަނގަޅަށް ކެއުން
ރޭގަނޑު މާ ލަސްވެފައި ހުންނަނިކޮށް ކެއުމަކީ އެއްގޮތަކަށްވެސް ރަނގަޅު ކަމެއް ނޫނެވެ. އަލްޒައިމާސް ބަލި ހުންނަ މީހުންނަށް ޑޮކްޓަރުން އަރުވާ ލަފާ އަކީ ރޭގަނޑު އަވަހަށް ކެއުމަށްފަހު ހެނދުނު ވަންދެން އިތުރު އެއްޗެއް ނުކައި ހުރުމަށެވެ. ޑޮކްޓަރުން ބުނާ ގޮތުގައި 12 ގަޑިއިރު ނުކައި ހުރުމަކީ ސިކުނޑީގެ ސިއްޙަތަށް ރަނގަޅު ކަމެކެވެ.
4. އެކަހެރި ނުވުން
ގިނަ ދިރާސާތަކުން ދައްކާ ގޮތުގައި އެކަނިވެރިވުމާއި އިޖްތިމާޢީ ގޮތުން އެކަހެރިވެފައި ހުރުމަކީ އަލްޒައިމާސް ޖެހުމުގެ ފުރުސަތު އިތުރުކޮށްދޭ ކަމެކެވެ. އެހެންނަމަވެސް އެކަނިވެރިކަމުގެ ސަބަބުން އަލްޒައިމާސް އަށް މަގުފަހިވޭތޯ ނުވަތަ އަލްޒައިމާސްގެ ސަބަބުން މީހުން އިޖްތިމާޢީ ގޮތުން އެކަހެރިވާން ބޭނުން ވޭތޯ އާއިމެދު ސައިންސްވެރިން ދަނީ އަދިވެސް ދިރާސައް ކުރަމުންނެވެ.
5. އާއިލާގައި ހަނދާނުގެ މައްސަލަ ހުންނަ މީހަކު ހުރިތޯ ބެލުން
އަލްޒައިމާސް ބަލި ޖެހިފައިވާ މީހުން އާއިލާގައި ތިބިނަމަ، އުޅެންވާނީ އެކަމާއިމެދު ވީހާވެސް ބޮޑަށް ސަމާލުވެގެންނެވެ. އެގޮތުން ބޮލަށް އެއްވެސް ގެއްލުމެއް ނުލިބޭތޯ ބަލަންވާނެއެވެ. އެއީ ތަނެއް ބޯޖެހި ގެއްލުމެއް ލިބިއްޖެނަމަ އަލްޒައިމާސް ގުޅުންހުރި ބަދަލުތަކެއް ސިކުނޑިއަށް އައިސްދާނެތީއެވެ.
6. ބްލަޑް ޕްރެޝާ ކޮންޓްރޯލް ކުރުން
ލޭ މައްޗަށް ދިއުމަކީ ހަށިގަނޑަށާއި ސިކުނޑިއަށް ވެސް ގެއްލުން ހުރި ކަމެކެވެ. އެހެންކަމުން އަބަދުވެސް ބްލަޑް ޕްރެޝަރާއި ކޮލެސްޓްރޯލް ހުންނަ މިންވަރު ބަލައި ޗެކް ކޮށް، ރަނގަޅު މިންވަރެއްގައި އެދެކަން ހިފެހެއްޓޭތޯ ބަލަން ވާނެއެވެ.