ފުޓްބޯޅަ ބޭނުންކޮށްގެން އާދަޔާހިލާފު މޮޅު ހުނަރުތަކެއް ދައްކާލައިގެން ދިވެހިންގެ ތެރޭގައި "ސްޕަމޭން" ގެ ނަމުން މަޝްހޫރު މުހައްމަދު ސައިފްގެ ހަރަކާތްތަކެއް އައްޑޫގައި ދައްކާލަން ނިންމައިފި އެވެ.
މި ހަރަކާތް އޮންނާނީ އަންނަ ހުކުރު ދުވަހު ހަވީރު މަރަދޫގަ އެވެ. ސައިފް ވަނީ ކުރިން ވެސް އައްޑޫގައި ހަރަކާތްތަކެއް ދައްކާލައިފަ އެވެ.
އޭނާގެ ހުނަރު އައްޑޫގައި މި ފަހަރު ދައްކާލަނީ ހުކުރު ދުވަހު ހަވީރު މަރަދޫ ވެންބޮޅޮފިށި ސްޓޭޑިއަމްގައި ފަށާ ފުލުހުންގެ ސައުތު އޮޕަރޭޝަން ކޮމާންޑް (އެސްއޯސީ) ހެޑް ކަޕް ފުޓްސަލް ޓޯނަމަންޓް ފެށުމުގެ ރަސްމިއްޔާތުގަ އެވެ.
ސައިފަކީ ފުޓްބޯޅައިގެ ފްރީ ސްޓައިލް ޗެމްޕިއަންގެ ގޮތުގައި ރިކޯޑް މުގުރާލުމަށް ފަހު، ބައިނަލްއަގުވާމީ ސްޓޭޖްތަކުގައި ވެސް ދިވެހިން ފަހުރުވެރިކޮށް ދީފައިވާ ފަންނާނެކެވެ. ސައިފްގެ ނަމަކީ ބޮޑުބެރުގައި ވެސް ވަރަށް މަޝްހޫރު ނަމެކެވެ.
ކުރިން ހަބޭސް ބޮޑުބެރު ގްރޫޕްގައި އުޅުނު ސައިފް މިހާރު އުޅެނީ 1430 ގަ އެވެ.
މި މަހުގެ 15 އާ ކުރިއަށް ގެންދާ އެސްއޯސީ ހެޑް ކަޕް ފުޓްސަލް ޓޯނަމަންޓް ވާދަ ކުރުމުގެ ފުރުސަތު ދީފައި ވަނީ ދެކުނު 10 އަތޮޅުގެ ޕޮލިސް ސްޓޭޝަންގައި މެދުގައި ކުޅޭ ކޮލިފައިން މެޗުތަކުން މޮޅުވި ހަތަރު ޓީމަކަށެވެ.
ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި 3 ވަނަ ޓީމަށް 5000 ރުފިޔާ ދިނުމަށް ހަމަޖެހިފައިވާ މި މުބާރާތަކީ ސަދަރން އޮޕަރޭޝަންސް ކޮމާންޑްގައި ހިމެނޭ ހަތަރު ޑިވިޝަންގެ އަތޮޅުތަކުގައި މަސައްކަތް ކުރާ މުވައްޒަފުންގެ މެދުގައި އޮތް ގުޅުން މިހާރަށް ވުރެ ރަނގަޅުކޮށް ގުޅިގެން މަސައްކަތް ކުރުމާއި އެއްޓީމެއްގެ ގޮތުގައި މަސައްކަތް ކުރުމުގެ ރޫހު އާލާ ކުރުމުގެ ގޮތުން ބާއްވާ މުބާރާތެކެވެ.