ފުޓްބޯޅަ ބޭނުންކޮށްގެން އާދަޔާހިލާފު މޮޅު ހުނަރުތަކެއް ދައްކާލައިގެން ދިވެހިންގެ ތެރޭގައި "ސްޕަމޭން" ގެ ނަމުން މަޝްހޫރު މުހައްމަދު ސައިފްގެ ކުޅަދާނަ ހަރަކާތްތަކާއި އެކު ސައުތު ޑިވިޝަން އޮޕަރޭޝަން ކޮމާންޑް (އެސްއޯސީ) ހެޑް ކަޕް ފުޓްސަލް މުބާރާތް ފަށައިފިއެވެ.
މަރަދޫ ވެންބޮޅަފިށި ސްޓޭޑިއަމްގައި ބޭއްވި ކުލަގަދަ ރަސްމިއްޔާތުގައި މުބާރާތް ފެށުމުގެ ގޮތުން ޝަރަފުއްދީން ސްކޫލްގެ ގްރޭޑް 2 ގެ ދަރިވަރުން ހުށަހަޅައިދިން ޑާންސަކަށްފަހު "ސުޕަމޭން" ވަނީ ފުޓްބޯޅަ ބޭނުންކޮށްގެން ކުޅިބެލުން ތެރިން ހައިރާން ކޮށްލާފައެވެ.
މުބާރާތް ހުޅުއްވައިދެއްވީ 1970ގެ އަހަރުތަކުގައި ރާއްޖޭގައި އެންމެ މަޝްހޫރު ފުޓްބޯޅަ ކުޅުންތެރިއާ އަބްދުﷲ މުފީދު (އުދުހޭ މުފީދު) އާއި އީކުއޭޓަރ ވިލެޖްގެ މެނޭޖަރ މުހައްމަދު ވަހީދުއެވެ.
މުބާރާތުގެ ފުރަތަމަ މެޗްގައި ގއ. ޕޮލިސް ޓީމާއި ދ އަތޮޅު ޕޮލިސް ޓީމް ބައްދަލުކުރި މެޗް ފޯރިގަދަ ކުޅުމަކަށްފަހު 2-1 ލަނޑުން ކާމިޔާބް ކުރީ ގއ. ޕޮލިސް ޓީމެވެ. ގއ ޓީމަށް ލަނޑު ޖަހާދިނީ އާދަމް އުސްމާން އާއި އަހުމަދު އިރުފާންއެވެ. ދ އަތޮޅު ޕޮލިސް ޓީމުން ޖެހި ހަމައެކަނި ލަނޑު އެޓީމަށް ކާމިޔާބްކޮށްދިނީ އަބްދުލް ޚާލިގް އަހްމަދުއެވެ. މޮޅު ކުޅުންތެރިއަކަށް ހޮވިފައިވަނީ ގއ ޓީމްގެ އަބްދުލް ނާސިރު އަލިފުޅުއެވެ.
މުބާރާތުގައި މިއަދު ކުޅުނު ދެވަނަ މެޗްގައި ތ އަތޮޅު ޕޮލިސް ޓީމާއި ފުވައްމުލަކު ސިޓީ ޕޮލިސް ޓީމް ބައްދަލުކުރި މެޗް 3-2 ލަނޑުން ކާމިޔާބް ކުރީ ފުވައްމުލަކު ޕޮލިސް ޓީމެވެ. މެޗްގައި ފުވައްމުލަކުން ޖެހި 3 ލަނޑުގެ ތެރެއިން 2 ލަނޑު ޖަހާދިނީ މޮޅު ކުޅުންތެރިއާ ހޯދި މުހައްމަދު ޝިހާމްއެވެ. އެޓީމްގެ 3 ވަނަ ލަނޑަކީ ތ އަތޮޅު ޕޮލިސް ޓީމް އަތުން ބައިކޮޅަށް ވަން ލަނޑެކެވެ. ތ އަތޮޅު ޓީމުން ލަނޑުޖެހީ އަހްމަދު ރަޝީދު އާއި އިސްމާއިލް މާޖިދްއެވެ.
ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި 3 ވަނަ ޓީމަށް 5000 ރުފިޔާ ދިނުމަށް ހަމަޖެހިފައިވާ މި މުބާރާތަކީ ސަދަރން އޮޕަރޭޝަންސް ކޮމާންޑްގައި ހިމެނޭ ހަތަރު ޑިވިޝަންގެ އަތޮޅުތަކުގައި މަސައްކަތް ކުރާ މުވައްޒަފުންގެ މެދުގައި އޮތް ގުޅުން މިހާރަށް ވުރެ ރަނގަޅުކޮށް ގުޅިގެން މަސައްކަތް ކުރުމާއި އެއްޓީމެއްގެ ގޮތުގައި މަސައްކަތް ކުރުމުގެ ރޫހު އާލާ ކުރުމުގެ ގޮތުން ބާއްވާ މުބާރާތެކެވެ.