ޑާކް ރެއިން އެންޓަޓައިންމަންޓްގެ ކުރިއަށް އޮތް ފިލްމް "މީ ލޯތްބަކީ" ގެ ފުރަތަމަ ލަވަ "އޭ މަންޖޭ" ބެލުންތެރިންނަށް ދައްކާލައިފި އެވެ.
މި ލަވައަކީ އެ ފިލްމުގައި ހިމެނޭ އަމިއްލަ ރާގުގެ ހަ ލަވައިގެ ތެރެއިން އެެއް ލަވަ އެވެ. "އޭ މަންޖޭ" ލަވަ ބެލުންތެރިންނަށް ދޫކޮށްލީ، ފިލްމުގެ ޕްރޮމޯޝަނަލް ވީޑިއޯ ލަވައެއްގެ ގޮތުގަ އެވެ.
މި ލަވައިގައި ފިލްމުގެ މަންޒަރުތައް ވެސް ހިމަނާފައިވާ އިރު، ލަވަ ކިޔާފައިވާ ތިން ފަންނާނުން ވެސް ލަވައިން ފެނިގެން ދެ އެވެ.
ފަތޯގެ މިއުޒިކަށް ހަދާފައިވާ "އޭ މަންޖޭ" ކިޔާފައި ވަނީ ފަތޯގެ އިތުރުން "މީ ލޯތްބަކީ" އިން ފެނިގެންދާ ފުބޫ އާއި އިބްރާހީމް އަމާން އެވެ. މި ފިލްމަކީ މޯލްޑިވިއަން އައިޑޮލް ސީޒަން އެކަކުން ވިދާލި އަމާންގެ ފުރަތަމަ ފިލްމެވެ.
"މީ ލޯތްބަކީ" ސިނަމާ އަށް އަންނާނީ އަންނަ އެޕްރީލް މަހުގެ ފަހެއްގަ އެވެ.
މިދިޔަ އަހަރު ޑާކް ރެއިނުން ގެނެސް ދިން "ވާށޭ މަށާއެކީ" ގެ ޑައިރެކްޓަރު އަލީ ޝިފާއު (ޗިއްޕެ) ޑައިރެކްޓްކޮށްފައިވާ "މީ ލޯތްބަކީ" ގެ ލީޑް ރޯލް ކުޅެފައި ވަނީ ޖުމައްޔިލް ނިމާލާއި މަރިޔަމް އައްޒަ އެވެ.
މުހައްމަދު އަލީ (މޮގާ) ޕްރޮޑިއުސްކޮށްފައިވާ ފިލްމުގެ ސްކްރީންޕްލޭ ލިޔެފައި ވަނީ އޭނާގެ އަންހެނުން އައިޝަތު ފުއާދު ތައުފީގާއި ޗިއްޕެ އެވެ.