ސަރުކާރަށް ވަރަށް ގިނަ ޚިދުމަތްތަކެއް ކޮށްދެއްވި ފަރާތެއް ކަމަށްވާ މައިޒާން އިބްރާހިމް މަނިކު އަވަހާރަ ވެއްޖެއެވެ.
މަޢުލޫމާތު ލިބޭ ގޮތުގައި އޭނާ އަވަހާރަ ވެފައިވަނީ ހޯމަ ދުވަހުގެ ރޭ 21:00 ހާއިރު އަވަށްޓެރި ލަންކާގެ ވެރިރަށް ކަމަށްވާ ކޮލޮމްބޯގައެވެ.
އަދި އިބްރާހިމް މަނިކު އަވަހާރަވީ ލޭގެ އާލާސްކަންފުޅަކަށް ފަރުވާ ކުރައްވަމުން ގެންދަވަނި ކޮށެވެ.
30 އަހަރަށްވުރެ ގިނަ ދުވަހު ދިވެހި ސަރުކާރަށް ޚިދުމަތް ކުރައްވާފައިވާ އިބްރާހިމް މަނިކު އެންމެ ގިނަ ދުވަހު ވަޒީފާ އަދާ ކުރައްވާފައި ވަނީ ކުރީގެ ޕަބްލިކް ވޯކްސް އަދި ކޮންސްޓްރަކްޝަން މިނިސްޓްރީގަައެވެ.
އިބްރާހިމް މަނިކު ވަނީ އޭނާގެ ޒުވާން ދުވަސްވަރު ކުޅިވަރުގެ ޙަރަކާތްތަކުގައި ވެސް ބައިވެރިވެފައެވެ. އެގޮތުން ހެންވޭރު ކްލަބްގެ ފޯވާޑްގެ ގޮތުގައި އޭނާ ވަނީ ދިގު މުއްދަތަކަށް ފުޓްބޯޅަ ކުރައްވާފައެވެ. މީގެ އިތުރުންވެސް ރާއްޖޭގައި ކުރިން ބޭއްވި ބައިސްކަލް ރޭސްތަކުގެ ތެރެއިން ގިނަ ރޭސްތަކެއްގައި ބައިވެރިވެ އިބްރާހިމް މަނިކު ވަނީ އެތައް ފަހަރަކު ޗެމްޕިއަންކަން ހޯއްދަވާފައެވެ.
ޕަބްލިކް އިންފްރާސްޓްރަކްޗާ މިނިސްޓްރީގެ ޑައިރެކްޓާ ޖެނެރަލްގެ މަޤާމުގައި ހުންނެވުމަށް ފަހު އިބްރާހިމް މަނިކު ރިޓަޔާ ކުރެއްވީ 2008 ވަނަ އަހަރު އެވެ.
އުމުރުން 82 އަހަރުގައި ނިޔާވިއިރު، އިބްރާހިމް މަނިކުގެ އަނބިކަނބަލަކާއި ހަ ބޭފުޅަކު ދުނިޔޭގައި އެބަ ތިއްބެވިއެވެ. އެއީ ދެ ފިރިހެން ބޭފުޅުންނާއި ހަތަރު އަންހެން ބޭފުޅުންނެވެ.