ޑާކް ރެއިން އެންޓަޓައިންމަންޓްގެ ކުރިއަށް އޮތް ފިލްމް "މީ ލޯތްބަކީ" ގެ ޕޯސްޓަރުތަކުގެ ތެރެއިން ބެލުންތެރިން އެންމެ ގަޔާވާ ޕޯސްޓަރަކަށް ފޭސްބުކްގައި ކޮމެންޓްކޮށްގެން، ޕްރިމިއާ ނައިޓުން ދެ ޓިކެޓް ހޯދުމުގެ ފުރުސަތު ހުޅުވާލައިފި އެވެ.
ފިލްމުގެ ތަފާތު 14 ޕޯސްޓަރެއް ހިމަނައިގެން، އެއިން ކޮންމެ ޕޯސްޓަރަކަށް ނަމްބަރެއް ދީފައިވާ ފޮޓޯއެއް "މީ ލޯތްބަކީ" ފޭސްބުކް ޕޭޖްގައި މިހާރު ވަނީ ހިމަނައިފަ އެވެ.
އެގޮތުން ބެލުންތެރިން އެންމެ ގަޔާވާ ޕޯސްޓަރެއްގެ ނަމްބަރު ކޮމެންޓް ކުރުމުން، ގުރުއަތަށް ދާނެ ކަމަށް ޑާކް ރެއިނުން ބުންޏެވެ.
ޕްރިމިއާ ނައިޓުން ދެ ޓިކެޓް ދޭނީ ގުރުއަތުން ހޮވޭ މީހަކަށެވެ.
މިދިޔަ އަހަރު "ވާށޭ މަށާއެކީ" ގެ ޕްރޮމޯޝަނަށް ވެސް ޑާކް ރެއިނުން، މިގޮތަށް ޓިކެޓް ދޫކޮށްފައިވެ އެވެ.
އަންނަ އެޕްރީލް މަހުގެ ފަހެއްގައި އަޅުވާ "މީ ލޯތްބަކީ" އަކީ އަލީ ޝިފާއު (ޗިއްޕެ) ޑައިރެކްޓްކޮށްފައިވާ ރޮމޭންޓިކް ކޮމެޑީއެކެވެ.
ޗިއްޕެ އާއި އައިޝަތު ފުއާދު ތައުފީގްގެ ސްކްރީންޕްލޭއަކަށް ހަދާފައުވާ ފިލްމުގައި ލީޑް ރޯލް ކުޅެފައި ވަނީ ޖުމައްޔިލް ނިމާލް (ޖުމަލް) އާއި މަރިޔަމް އައްޒަ އެވެ. އަދި އެ ދެ ތަރިންނާ އެކު ފިލްމުން ވަރަށް ބޮޑު ކާސްޓެއް ފެނިގެން ދާނެ އެވެ.
މީ ލޯތްބަކީ" ގެ ފުރަތަމަ ޕްރޮމޯޝަނަލް ލަވަ ވެސް ބެލުންތެރިންނަށް ދޫކޮށްލައިފައިވާ އިރު، މިހާރު އަންނަނީ ފިލްމުގެ ޓިކެޓް ވެސް ބުކްކޮށް ދެމުންނެވެ. އެކަމަށް ހާއްސަ ނަމްބަރަކީ 9911229 އެވެ.