އިންތިހާބުތަކުގައި އެމްޑީޕީގެ ޓިކެޓްގައި ވާދަ ކުރާ އަންހެން ކެންޑިޑޭޓުންނަށް ކެމްޕޭން ކުރަން މާލީ އެހީތެރިކަން ފޯރުކޮށް ދިނުމަށް އެ ޕާޓީން ނިންމައިފި އެވެ.
އެމްޑީޕީން ބުނީ އެ ޕާޓީން އެގޮތަށް ނިންމީ ދިވެހި ދައުލަތުގެ ކޮންމެ މުވައްސަސާއެއްގައި އެންމެ ހަރަކާތްތެރި އަދި މަސައްކަތްތެރި ބަޔަކީ އަންހެނުން ކަމަށް ވިޔަސް ކަންކަން ނިންމާ ފެންވަރުގަ އާއި އިންތިހާބީ މަގާމުތަކުގައި ތަމްސީލު ކުރާ އަންހެނުން މަދު ކަމުން ކަމަށެވެ.
އެހެންވެ އަންހެން ކެންޑިޑޭޓުންނަށް ކެމްޕޭން ފައިނޭންސް ފޯރުކޮށް ދިނުމުގެ މައިގަނޑު މަގްސަދަކީ ސިޔާސީ އަދި ދައުލަތުގެ އިސް މަގާމުތަކާއި އިންތިހާބު ކުރެވޭ މަގާމުތަކުގައި އަންހެނުންގެ ހިއްސާ އިތުރު ކުރުމަށް މަގުފަހިކޮށް ދިނުމުގެ ކަމަށް އެ ޕާޓިން ބުންޏެވެ.
އެމްޑީޕީން އަދި ބުނީ މަގާމުތަކަށް އައުމުގަ އާއި އިންތިހާބުތަކުގައި ބައިވެރިވުމަށް ތަފާތު އެކި ގޮންޖެހުންތައް އަންހެނުންނަށް އެބަހުރި ކަމަށެވެ. އެގޮތުން ރައްޔިތުންގެ މަޖިލިހާއި، ލޯކަލް ކައުންސިލްތަކާއި، ދައުލަތުގެ އެކި މަގާމުތަކުގައި ތަމްސީލް ކުރާ އަންހެނުންގެ ނިސްބަތް ފަސް ޕަސަންޓަށް ވުރެ ވެސް ދަށް ކަމަށް ބުންޏެވެ.