ރާއްޖޭގެ ގިނަ ބަޔަކު އެކިއެކި ބޭނުންތަކަށްޓަކައި ދަތުރު ކުރާ މަޝްހޫރު މަންޒިލެއް ކަމަށްވާ ތައިލޭންޑްގެ ވެރިރަށް ބެންކޮކްގައި ދިވެހި ކާނާ ލިބޭ ރެސްޓޯރެންޓެއް ހުޅުވައިފިއެވެ.
އެގޮތުން އެ ރެސްޓޯރެންޓް ހުޅުވާފައި ވަނީ ބެންކޮކްގެ ޕްރަތޫނާމް ސަރަޙައްދުގައެވެ. "އޮލިވް 15" ގެ ނަމުން ހުޅުވާފައިވާ އެ ރެސްޓޯރެންޓް ހުންނަނީ ޕްރަތޫނާމްގެ ޕެޗަބުރީ ރޯޑް، ސޮއި 15 ގައެވެ.
މަޢުލޫމާތު ލިބޭ ގޮތުގައި އެ ރެސްޓޯރެންޓް ހުޅުވާފައި ވަނީ ދިވެހިންނަށް ޚިދުމަތް ދިނުމުގެ މަޤްސަދުގައި އުފައްދާފައިވާ ކުންފުންޏެއް ކަމަށްވާ އޭޝިއާ ޝިޕިންގް އެންޑް އިންޓަނޭޝަނަލް ޓްރޭޑިންގް ކުންފުނިންނެވެ.
އެ ރެސްޓޯރެންޓުން ލިބެން ހުންނަ ތަކެތީގެ ތެރޭގައި ދިވެހި ހެދިކާ އާއި އެހެނިހެން ދިވެހި ކެއުންތަކުގެ އިތުރުން ތައި، އިޓާލިއަން އަދި ލެބަނީސް ކުޒީންގެ ކާނާވެސް ހިމެނެއެވެ.
އެ ރެސްޓޯރެންޓް ހުޅުވާފައިވާ ކުންފުންޏާއި ހަވަލާދީ ސަން އޮންލައިން ނޫހުގައި ރިޕޯޓް ކޮށްފައިވާ ގޮތުގައި "އޮލިވް 15" ހުޅުވާފައި ވަނީ ދިވެހި ކެއުން ދިވެހިންނަށް ލިބޭނެ ގޮތް ހެދުމަށްޓަކައެވެ. އަދި އެ ރެސްޓޯރެންޓުން މަސްހުންޏާއި ރޮށިން ފެށިގެން މަސްބަތާއި ރިހާކުރު ފަދަ އެކިއެކި ދިވެހި ކެއުންތައް ލިބެން ހުންނާނެއެވެ.
މަޢުލޫމާތު ލިބޭ ގޮތުގައި "އޮލިވް 15" ގައި ދިވެހި ކެއުން ތައްޔާރު ކުރާނީ ދިވެހި އަންހެން ކަނބަލުންތަކެއްގެ އިރުޝާދުގެ ދަށުން ތަމްރީން ކޮށްފައިވާ ޝެފުންނެވެ.
ކޮންމެ ދުވަހަކުވެސް ހެނދުނު 09:00 އިން ދަންވަރު 01:00 އާއި ހަމައަށް ހުޅުވިފައި ހުންނާނެ އެ ރެސްޓޯރެންޓް ހުޅުވި އޭޝިއާ ޝިޕިންގް އެންޑް އިންޓަނޭޝަނަލް ޓްރޭޑް އިް ބުނާ ގޮތުގައި އެކުންފުނިން އަމާޒް ކުރަނީ ދިވެހި ރަހަތަށް މުޅި ދުނިޔެއަށް ތަޢާރަފް ކުރުމަށެވެ.