ރޭ ދަންވަރު 1:15 ހާއިރު ސ. މަރަދޫގައި ހިނގި އަލިފާނުގެ ހާދިސާއެއްގައި އެއްގޭގެ ބަދިގެ އަނދައި ހުލިވެ، އިތުރު ދެ ގެއަކަށް އެކިވަރުގެ ގެއްލުން ވެއްޖެއެވެ.
މަރަދޫން ވާހަކަ ދެއްކި މީހަކު ބުނީ އަލިފާން ފުރަތަމަ ރޯވީ އަބުހަރީ މަންޒިލް ގޭގެ ބަދިގޭގައި ކަމަށެވެ. އަދި އަލިފާންގަނޑު ކޮންޓްރޯލް ނުވެ އެސަރަހައްދުގައި ހުރި އެހެން ދެގެއަކަށްވެސް ގެއްލުންވިކަމަށެވެ.
އަބްހަރީ މަންޒިލް ގޭގެ ބަދިގޭގައި ރޯވި އަލިފާންގަނޑު ކޮންޓްރޯލް ކުރެވުނުއިރު އެގޭގެ ބަނދިގޭ ވަނީ ވަރަށް ބޮޑަށް އަދައިގެން ގޮސްފައެވެ. މިހާދިސާގައި އެއްވެސް މީހަކަށް އަނިޔާވެފައި ނުވެއެވެ.
އަލިފާން ކޮންޓްރޯލް ކޮށްފައިވަނީ ހިތަދޫ ފަޔާ އެންޑް ރެސްކިއު ސާވިސް އާއި އާއްމުން ގުޅިގެން ކުރި މަސައްކަތުންނެވެ. މިހާދިސާ ހިނގަން ދިމާވި ސަބަބެއް އަދި އެނގިފައި ނުވެއެވެ.