ރާއްޖޭގައި ކުރިން ވެރިކަން ކުރެއްވި ރައީސް ސުމުއްވުލް އަމީރު މުހައްމަދު އަމީން ދޮށިމޭނާ ކިލެގެފާނުގެ ހަނދާނުގައި، ކޮންމެ އަހަރަކުވެސް އަމީނިއްޔާ ސްކޫލުން ދޭ މުހައްމަދު އަމީން ދީދީ އެވޯޑް މިފަހަރު ލިބިފައި ވަނީ ސ. ހުޅުދޫ/ ޖަވާހިރުވިލާ، މަރިޔަމް މަލާކް ހުސެއިން ރަޝީދަށެވެ.
އަމީނިއްޔާ ސްކޫލުން އަމީން ދީދީ އެވޯޑް ދޭން ފަށާފައި ވަނީ މީގެ 22 އަހަރު ކުރިންނެވެ.
އެގޮތުން އަމީނިއްޔާ ސްކޫލުގެ 2017 ވަނަ އަހަރުގެ އެކިއެކި މަޤާމްތަކަށް ހޮވުނު ދަރިވަރުންނާއި މަޤާމުތައް ހަވާލު ކުރުމަށްޓަކައި ބޭއްވި ރަސްމިއްޔާތުގައި، އަމީން ދީދީ އެވޯޑް މަލާކް އާއި ހަވާލުކޮށް ދެއްވީ އެޑިއުކޭޝަން މިނިސްޓަރު ޑރ. އައިޝަތު ޝިހާމެވެ.
މަލާކް ގްރޭޑް ހަތެއް ނިންމާފައި ވަނީ ސ. ހުޅުދޫ ސްކޫލުންނެވެ. އެސްކޫލްގެ ސީނިއާ ޕްރިފެކްޓްގެ މަޤާމް އަދާކޮށްފައިވާ މަލާކް ވަނީ ހުޅުދޫ ސްކޫލްގެ ޑެޕިއުޓީ ކެޕްޓަންގެ މަޤާމުގެ އިތުރުން އިނގިރޭސި ކްލަބްގެ ކެޕްޓަން ކަންވެސް ކޮށްފައެވެ.
މުހައްމަދު އަމީން ދީދީ އެވޯޑް އަކީ 1994 ވަނަ އަހަރު އަމީނިއްޔާ ސްކޫލުން އެސްކޫލްގެ ރަންޔޫބިލް ޙަރަކާތާއި ގުޅިގެން އުފެއްދި ޓްރަސްޓް ފަންޑްގެ ދަށުން ކޮންމެ އަހަރަކުވެސް، އަތޮޅޮ ތެރޭގެ ސްކޫލްތަކުން ގްރޭޑް ހަތެއް ނިންމާ ދަރިވަރަކަށް އަމީނިއްޔާ ސްކޫލުން ކިޔަވާ ނިމެންދެން ދޭ އެވޯޑެކެވެ.
އެގޮތުން އެ އެވޯޑް ލިބޭ ދަރިވަރެއްގެ އޯލެވެލް އިމްތިހާން ނިމެންދެން ސްކޫލްގެ ބައެއް ޚަރަދުތައް ބަލަހައްޓާނީ އަމީނިއްޔާ ސްކޫލުންނެވެ. މީގެ އިތުރުން ސްކޫލް ނިމެންދެން ކޮންމެ މަހަކު އެދަރިވަރަކަށް ޕޮކެޓް މަނީ ވެސް ލިބޭނެއެވެ.
އަމީން ދީދީ އެވޯޑަށް ދަރިވަރުން ހޮވަނީ އެ އެވޯޑަށް ކުރިމަތިލާ ކުދިންގެ މެދުގައި ނަގާ ޓެސްޓަކުން އެންމެ ރަނގަޅު ނަތީޖާ ހޯދާ ދަރިވަރަކު ބަލައިގެންނެވެ.
މިހާތަނަށް 18 ދަރިވަރަކަށް އެ އެވޯޑް ލިބި އަމީނިއްޔާ ސްކޫލުން ތަޢުލީމް ޙާސިލް ކޮށްފައި ވާއިރު، މިހާރުވެސް އެސްކޫލްގެ ގްރޭޑް 9 އާއި 10 ގައި އަމީން ދީދީ އެވޯޑް ހާސިލް ކުރި ދެ ދަރިވަރުން ދަނީ ކިޔަވަމުންނެވެ.