ސަދަން އޮޕަރޭޝަންސް ކޮމާންޑް (އެސްއޯސީ) ހެޑް ކަޕްގެ ފައިނަލް މިއަދު ހަވީރު މަރަދޫ ވެންބޮޅަފިށި ސްޓޭޑިއަމްގައި އޮންނާނެއެވެ.
ދެކުނުގެ 10 އަތޮޅުގެ ޕޮލިސް ސްޓޭޝަންގެ މެދުގައި ކޮލިފައިން ކުޅެގެން ކޮލިފައިވި 4 ޓީމްގެ މެދުގައި ކުރިއަށްދިޔަ މި މުބާރާތުގެ ފައިނަލްގައި މިއަދު ކުޅޭނީ ތ އަތޮޅު ޕޮލިސް ޓީމާއި ދ އަތޮޅު ޕޮލިސް ޓީމެވެ.
ފައިނަލް މެޗްގެ ހަފްލާ ކުލަގަދަ ކުރުމުގެ ގޮތުން ހާއްސަ އަންހެން ފުޓްސަލް މެޗެއް ފައިނަލް މެޗްގެ ކުރިން ކުޅުމަށް ވަނީ ހަމަޖެހިފައެވެ. އެ މެޗްގައި ބައްދަލުކުރާނީ ހަބޭސް ފޭދޫ އަންހެން ފުޓްސަލް ޓީމާއި މަރަދޫ ވުމެން އެފްސީއެވެ. މި މެޗް 4:15 ގައި ކުޅުމަށް ހަމަޖެހިފައިވާ އިރު ފައިނަލް މެޗް ފަށާނީ 5 ޖަހާއިރުއެވެ.
ޗެމްޕިއަން ޓީމަށް 20،000 ރުފިޔާ، ރަނަރަޕް ޓީމަށް 10،000 ރުފިޔާ އަދި 3 ވަނަ ޓީމަށް 5000 ރުފިޔާ ދިނުމަށް ހަމަޖެހިފައިވާ މި މުބާރާތަކީ ސަދަރން އޮޕަރޭޝަންސް ކޮމާންޑްގައި ހިމެނޭ ހަތަރު ޑިވިޝަންގެ އަތޮޅުތަކުގައި މަސައްކަތް ކުރާ މުވައްޒަފުންގެ މެދުގައި އޮތް ގުޅުން މިހާރަށް ވުރެ ރަނގަޅުކޮށް ގުޅިގެން މަސައްކަތް ކުރުމާއި އެއްޓީމެއްގެ ގޮތުގައި މަސައްކަތް ކުރުމުގެ ރޫހު އާލާ ކުރުމުގެ ގޮތުން ބާއްވާ މުބާރާތެކެވެ.