3 ބުރީގެ އިމާރާތްތަކުން ވެއްޓޭ މީހުންގެ ތެރެއިން ސަލާމަތް ވަނީ ދެބައިކުޅަ އެއްބައި މީހުންނެވެ. 10 ބުރީގެ އިމާރާތަކުން ވެއްޓިއްޖެނަމަ ސަލާމަތްވުމަކީ ވަރަށް ނާދިރު ކަމެކެވެ. ނަމަވެސް މަރަކީ ﷲ ގެ ބާރުދަށުގައި ވާ ކަމެކެވެ. އެކަލާނގެ އިރާދަކުރައްވައިފިނަމަ 47 ބުރީގެ އިމާރާތަކުން ވެއްޓުނު މީހެއްވެސް ސަލާމަތްވެދާނެއެވެ. 2007 ވަނަ އަހަރު ވަނީ މިފަދަ ހާދިސާއެއް ހިނގާފައެވެ.
އެމެރިކާގެ ނިއު ޔޯކްގެ ބޮޑެތި ސްކައި ސްކްރޭޕާސްތަކުގެ ބިއްލޫރި ސާފު ކުރަން އުޅުނު ދެބެއިންނެވެ. 2007 ވަނަ އަހަރު ޑިސެމްބަރު މަހުގެ 7 ވަނަ ދުވަހު މޮރޭނޯ އާއި އޭނާގެ ކޮއްކޮ އެޑްގާ ވަނީ އާދައިގެ މަތިން އުސް އިމާރާތެއްގެ މައްޗަށް ސާފުކުރަން އަރާފައެވެ.
ބިއްލޫރިތައް ސާފުކުރަން ހަދާފައިވާ ތަނުގެ މައްޗަށް ދެބެއިން އެރިތަނާ ދެމީހުން ސަލާމަތީ ގޮތުން އަޅައިގެން ތިބި ކޭބަލްތައް ހަރުކުރި ތަނާ އެއްކޮށް ބިންދައިގެން ވެއްޓިއްޖެއެވެ. އެޑްގާ ވެއްޓިގެން ގޮސް ޖެހުނީ ވަކަރުން ހަދާފައިވާ ފެންސެއްގައެވެ. 144 މީޓަރު އުސްތަނަކުން ވެއްޓިފައިވާއިރު ބެލެވޭ ގޮތުގައި އޭނާ ވެއްޓިފައިވަނީ ގަޑިއެއްގެ ތެރޭގައި 120 މޭލު ބާރުމިނުގައެވެ. އަދި އޭނާގެ ހަށިގަނޑު ވަނީ ސަލާމަތްނުކުރެވޭ ވަރަށް ގެއްލުންވެފައެވެ.
އެސަރަހައްދުގައި ހަރަކާތްތެރިވި ފަޔާފައިޓަރުންނާއި ޕެރަމެޑިކުން ބުނެފައިވާ ގޮތުން މޮރޭނޯ ވެއްޓިފައި އޮތީ ދަގަނޑުތަކެއްގެ ތެރެއަށެވެ. އޭނާ އޭރުވެސް ނޭވާލާ ކަމަށާއި ތެދުވަންވެސް މަސައްކަތް ކުރިކަމަށް އެމީހުން ބުނެފައިވެއެވެ. ފަޔާފައިޓަރުން އޭނާ އެމްބިއުލާންސަށް އެރުވުމަށް ނެގީ ވަރަށް ފަރުވާތެރިކަމާއެކުގައެވެ.
ހޮސްޕިޓަލަށް ގެންދިއުމުން މޮރޭނޯ ވަނީ ކޯމާއަކަށް ވަގުތުން ލާފައެވެ. އަދި އޭނާ އަށް ވަނީ 24 ޕައިންޓުގެ ލޭ އަޅާފައެވެ. ސިކުނޑިއަށް އެކިވަރުގެ އަނިޔާތަކެއް ލިބިފައިވާއިރު، މޭމަތީގެ ކަށިތަކާއި ދެއަތާއި ފައިވެސް ވަނީ ބިނދިފައެވެ. ޑޮކްޓަރުންގެ ޓީމަކުން ވަނީ މޮރެނޯއާއި ހަވާލުކުރެވި އެތައް އޮޕަރޭޝަނެއްވެސް ކޮށްފައެވެ.
ނިއުޔޯކް ޕްރެސްބިޓެރިން ހޮސްޕިޓަލުގެ ސީއީއޯ މިހާދިސާއާ ގުޅިގެން ބުނެފައިވަނީ ސިއްހީ މުއުޖިޒާތެއް ހޯދާނަމަ އެއީ އެފަދަ ހާދިސާއެއް ކަމަށެވެ. ނިއުޔޯކް ސިޓީ ފަޔާ ޑިޕާޓްމެންޓުން ޑރ. ގްލެން އަސޭޑާ ބުނެފައިވަނީ އޭނާގެ ހަޔާތުގައި ފެނުނު ހަތަރު ބުރީގެ އިމާރާތުން ވެއްޓޭ މީހެއްވެސް ސަލާމަތް ވަނީ ވަރަށް މަދުންނެވެ. އެހާދިސާއަކީ މަތީ ފަރާތެއްގެ ކޮންޓްރޯލުން ހިނގި ހާދިސާއެއް ކަމަށް އޭނާ ބުނެފައިވެއެވެ.
ކޯމާގައި 3 ހަފްތާގައި އޮވުމަށްފަހު މޮރޭނޯއަށް ހޭވެރިކަން ލިބިފައިވަނީ ޑިސެމްބަރު މަހުގެ 25 ވަނަ ދުވަހުގައެވެ. އެމީހުން ފާހަގަކުރާ ކްރިސްމަސް ދުވަހު އޭނާ ހޭލިއިރު އޭނާގެ އަންހެނުން ރޮސާރިއޯ ވަނީ އޭނާގެ ކައިރީގައެވެ. އެންމެ ފުރަތަމަ ވަރަށް ނުސާފުކޮށް މަންޒަރު ފެނުނު ނަމަވެސް ފުރަތަމަވެސް އޭނާގެ ލޮލުގައި އޭނާގެ އަންހެނުން ވަނީ އަޅައިގެންފައެވެ.
އެކްސިޑެންޓަށް ފަހު ކުރި ތަހުގީގަކުން ހާމަވެގެންގޮސްފައިވަނީ ސަލާމަތީ ގޮތުން ބޭނުންކުރި ކޭބަލް ހުރީ ރަނގަޅަށް ނުގުޅިފައެވެ. ނަމަވެސް މޮރޭނޯ ވަނީ ސަލާމަތީ ގޮތުން އަޅަން ޖެހޭ ފިޔަވަޅުތައް އަޅައިގެން ކަން ސާބިތުވެފައިވެއެވެ.
މޮރޭނޯއަށް ވަނީ އެކްސިޑެންޓަށްފަހު ކޮމްޕެންސޭޝަން ޗެކެއް ދީފައެވެ. އޭނާ ވަނީ ފީނިކްސް އަށް ބަދަލުވެ ދިރިއުޅުން އެތަނުގައި ފަށާފައެވެ. ނަމަވެސް އޭނާ ބުނީ 3 އަހަރު ދުވަސް ވަންދެން އޭނާގެ ކޮއްކޮގެ މަރުގެ ހިތާމަ ކުރިކަމަށެވެ. އަދި އެކްސިޑެންޓަށް ފަހު ކޮންމެ ދުވަހަކު އޭނާ ސަލާމަތްވުމުން ޝުކުރު އަދާކުރާ ކަމަށް ބުނެފައިވެއެވެ.