ރާއްޖޭގައި ސްވައިން ފްލޫ ނުވަތަ އެޗް1އެން1 ފެތުރެމުންދާތީ، ބުދަ ދުވަހު އޭޑީކޭ ހޮސްޕިޓަލުގައި ހުޅުވާ ފްލޫ ކްލިނިކުން ޚިދުމަތް ދޭނީ މުޅިން ހިލޭ ކަމަށް އެ ހޮސްޕިޓަލުން ބުނެފިއެވެ.
ވަގުތު ނޫހުން ރިޕޯޓް ކުރާ ގޮތުގައި އޭޑީކޭ ހޮސްޕިޓަލުގެ ހުން އަދި ރޯގާ ކްލިނިކްގެ ޚިދުމަތްތައް ޤައުމީ ޔުނިވާސިޓީ (ސޯސަންގެ) ގެ ފެކަލްޓީ އޮފް ސައިންސް އިން ހިލޭ ލިބެން ހުންނާނެ އެވެ. އަދި އޭޑީކޭގެ ފްލޫ ކްލިނިކް ހުޅުވިފައި ހުންނާނީ ހެނދުނު 10:00 އިން ފެށިގެން ރޭގަނޑު 22:00 އާއި ހަމައަށް ކަމަށްވެސް މަޢުލޫމާތު ލިބެއެވެ.
އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ވެސް ވަނީ ފްލޫ ކްލިނިކެއް ހުޅުވާފައެވެ. އަދި އައިޖީއެމްއެޗް ފްލޫ ކްލިނިކް އަށް ދާ މީހުންގެ އަދަދު އިތުރުވެ ބާރު ބޮޑުވުމުގެ ސަބަބުން އަންގާރަ ދުވަހު ވަނީ ތާޖުއްދީން ސްކޫލްގައި ވެސް ފްލޫ ކްލިނިކެއް ހުޅުވާފައެވެ.
އައިޖީއެމްއެޗް ގެ ފްލޫ ކްލިނިކްތަކުން 24 ގަޑިއިރު ޚިދުމަތް ދޭނެއެވެ.
ހެލްތު މިނިސްޓްރީ އިން ހޯމަ ދުވަހުގެ ރޭ ވިދާޅުވި ގޮތުގައި ސްވައިން ފްލޫއަށް ޓެސްޓް ކުރި 251 މީހުންގެ ތެރެއިން 51 މީހުން ވަނީ ފްލޫ އަށް ޕޮޒިޓިވް ވެފައެވެ.
ސްވައިން ފްލޫ ޖެހިގެން މިހާތަނަށް އެކަކު ވަނީ މަރުވެފައެވެ.