ރާއްޖޭގައި ސްވައިން ފްލޫ ހަލުވި ކަމާއެކު ފެތެރުމުންދާތީ އައްޑޫ މިބައްޔަށް ތައްޔާރުވުމުގެ ގޮތުން އައްޑޫ ސިޓީގެ ހިތަދޫ ރީޖަނަލް ހޮސްޕިޓަލުގައި ފްލޫ ކްލިނިކެއް ގާއިމުކުރަން ނިންމައިފިއެވެ.
މިއަދު ހިތަދޫ ރީޖަނަލް ހޮސްޕިޓަލްގައި ބޭއްވި ނޫސް ކޮންފަރެންސެއްގައި އެތަނުގެ މެނޭޖަރ އަބްދުﷲ ޖަމީލް ވިދާޅުވީ މާލޭގެ އައިޖީއެމްއެޗާއި އޭޑީކޭ ހޮސްޕިޓަލުގައި މިހާރު ފްލޫ ކްލިނިކް ގާއިމްކޮށް ބަލިމީހުން ބަލަމުންދާއިރު އައްޑޫ ސިޓީގެ ހިތަދޫ ރީޖަނަލް ހޮސްޕިޓަލުގައި މިޚިދުމަތް ގާއިމުކުރުމަށް ނިންމާފައިވާ ކަމަށެވެ.
މިހާތަނަށް ހިތަދޫ ރީޖަނަލް ހޮސްޕިޓަލުން ސްވައިން ފްލޫގެ ކޭހެއް ފެނިފައިނުވާ ކަމަށް އެހޮސްޕިޓަލުން މައުލޫމާތު ދީފައިވާއިރު ހޮސްޕިޓަލް ވަނީ މިބައްޔަށް ފަރުވާ ދިނުމަށް ތައްޔާރުވެފައިކަމަށް ހޮސްޕިޓަލުން ބުންޏެވެ..
ހޮސްޕިޓަލުން ސްވައިން ފްލޫ ޓެސްޓު ހެދުމުގެ ވަސީލަތެއް ނެތް ނަމަވެސް އެބަލިއަށް ޝައްކުވެއްޖެ ނަމަ ސާމްޕަލް މާލެ ފޮނުވައިގެން ޓެސްޓް ކުރެވޭނެ ގޮތް ހަމަޖައްސާފައިވާ ކަމަށް ހޮސްޕިޓަލުން ބުންޏެވެ.
މި ނޫސް ކޮންފަރެންސްގައި ހެލްތު މިނިސްްޓްރީގެ ސްޓޭޓް މިނިސްޓަރ މުހައްމަދު ހަބީބް ވިދާޅުވީ ބަލިން ރައްކާތެރިވުމަށް ރައްކާތެރިކަމުގެ ގޮތުން އަޅަން ޖެހޭ ފިޔަވަޅު އެޅުން މުހިއްމު ކަމަށެވެ. އެގޮތުން ކެއްސާ ކިނބިހި އަޅާއިރު އަނގައިމަތީ އަތް އެޅުމާއި އަތް ތައް ސާފު ކޮށް ބެހެއްޓުން މުހިއްމު ކަމަށެވެ.
މި ބަލި ޖެހިފައިވާ މީހުންނަށް އާއްމުގޮތެއްގައި ދޭ ބޭސް އައްޑޫގައި ލިބެން އެބަހުރިކަމަށާއި އެންމެ އިސްކަމެއް ދެއްވަނީ މި ބަލީގެ ސައްހަ މައުލޫމާތު ރައްޔިތުންނަށް ފޯރުކޮށްދިނުމަށެވެ. އަދި މި މައުލޫމާތު ފޯރުކޮށް ދިމުމަށް މީޑިއާގެ ކިބައިން އެދިވަޑައިގަތެވެ.