ރެޑް ކްރެސެންޓު އައްޑޫ ބްރާންޗުން އައްޑޫގައި މަސައްކަތްކުރާ ބިދޭސީންނަށް މިހާރު ރާއްޖޭގައި ފެތުރެމުންދާ ސްވައިން ފްލޫއާއި ބެހޭ ގޮތުން މައުލޫމާތު ދީފިއެވެ.
އިއްޔެ ހަވީރު ރެޑް ކްރެސެންޓު އައްޑޫގެ މެމްބަރުން ހިތަދޫގެ މަގުތަކުގައި ހިނގައި ދިމާވާ ބިދޭސީންނަށް އެޗް1އެން1 ވައިރަސް ޖެހޭ ގޮތާއި ފެތުރޭގޮތް އަދި ބަލިން ސަލާމަތްވުމަށް ކުރަން ޖެހޭ ކަންތައް ބިދޭސީންނަށް ކިޔާދީފައިވެއެވެ.
ގައިން ގަޔަށް އަރާ މިބައްޔާއި ބެހޭގޮތުން ބިދޭސީ މީހުން ގެންގުޅޭ ދިވެހި ގިނަ ކުންފުނިތަކުން އެއްވެސް މައުލޫމާތެއް ފޯރުކޮށްފައިނުވާ ކަން އެނގިގެންގޮސްފައިވެއެވެ.
އަދި ބައެއް މީހުންނަށް މިބަލި ފެތުރެމުންދާ ކަންވެސް ނޭނގޭ ކަމަށް މައުލޫމާތު ލިބެއެވެ. އިއްޔެ ރެޑް ކްރެސެންޓް އިން ކުރި މިމަސައްކަތުން ބިދޭސީންގެ ގިނަ ބަޔަކު ބައްޔާއި މެދު ހޭލުންތެރިވެފައިވާ ކަމަށާއި މައުލޫމާތު ފޯރުކޮށްދެވުނު ފަރާތުގެ ސަބަބުން އައްޑޫގައި މަސައްކަތް ކުރާ އެހެން ބިދޭސީންނަށްވެސް މިކަމާއި ގުޅިގެން މައުލޫމާތު ލިބިގެންދާނެއެވެ.