ރާއްޖޭގައި ފެތުރެމުންދިޔަ ސްވައިން ފްލޫ ޖެހިގެން ޑޮކްޓަރަށް ދައްކާ ބަލިމީހުންގެ އަދަދު މަދުވާން ފަށައިފި ކަމަށް ހެލްތް ޕްރޮޓެކްޝަން އޭޖެންސީ އިން ބުނެފިއެވެ.
އެޗްޕީއޭ އިން ބުނެފައިވަނީ މިހާތަނަށް އެޗް1އެން1 އަށް ޕޮސިޓިވްވި މީހުންގެ އަދަދު 114 އަށް އަރާފައިވާ ކަމަށާއި ނަމަވެސް މިހާރު މިބައްޔަށް ޝައްކު ކުރެވިގެން ފަރުވާ ހޯދުމަށް އަންނަ މީހުން ވަނީ މަދުވެފައެވެ.
އެޗްޕީއޭ އިން އާންމު ކުރި ތަފާސް ހިސާބުތައް ދައްކާ ގޮތުން އިއްޔެ މާލެއިން 680 މީހުން ޑޮކްޓަރަށް ދެއްކިއިރު އޭގެ ކުރީ ދުވަހު ދައްކާފައިވަނީ 869 މީހެކެވެ. މިއަދަދު ވަނީ އޭގެ ކުރީ ދުވަހު 1551ގައެވެ.
ރާއްޖޭގެ އެކި ހިސާބުތަކަށް ބަލާއިރު ރ އަތޮޅުން 99 މީހަކު މިބައްޔަށް ޝައްކުކުރެވިގެން ޑޮކްޓަރަށް ދައްކާފައިވެއެވެ. އަދި ނ އަތޮޅުން ވަނީ 104 މީހަކު ފްލޫ އަށް ޝައްކުކުރެވިގެން ޑޮކްޓަރަށް ދައްކާފައެވެ. މި ދެ އަތޮޅަކީ އެންމެ ގިނައިން މިބައްޔަށް މީހުން ފަރުވާ ހޯދަމުން އަންނަ ދެ އަތޮޅެވެ.
ނަމަވެސް އިއްޔެއާއި އަޅާ ބަލާއިރު މިއަދު ވަނީ ބައްޔަށް ޕޮސިޓިވް ވި މީހުންގެ އަދަދު ދެގުނައަށް އިތުރުވެފައެވެ. އިއްޔެ ތިން މީހުން ޕޮސިޓިވް ވެފައިވާއިރު މިއަދު ވަނީ ހަ މީހަކު ޕޮސިޓިވްވެފައެވެ.
މިހާތަނަށް ރާއްޖެއިން ސްވައިން ފްލޫ ޖެހިގެން މަރުވެފައިވަނީ ދެ މީހުންނެވެ. އެއީ މިމަހުގެ ކުރީކޮޅު 26 އަހަރުގެ ފިރިހެނަކާއި ބުރާސްފަތި ދުވަހު 51 އަހަރުގެ އަންހެނެކެވެ.