ދިވެހިރާއްޖެއިން ޓިއުބާކިއުލޯސިސް (ޓީބީ) ނައްތާލުމަށްޓަކައި ކުރަންޖެހޭ މަސައްކަތްތަކާއި ބެހޭގޮތުން ގްލޯބަލް ފަންޑާއި ސްޓޮޕް ޓީބީ ޕާޓްނާޝިޕްގެ ބޭފުޅުން މަޝްވަރާތައް ކުރަން ފަށައިފިއެވެ.
ހެލްތު މިނިސްޓްރީގެ ދައުވަތަކަށް މިހާރު މާލެ ވަޑައިގެން އުޅުއްވާ ސްޓޮޕް ޓީބީ ޕާޓްނާޝިޕްގެ އެގްޒެކެޓިވް ޑައިރެކްޓަރު ޑރ. ލުޗިކާ ޑިޓުއީ އާއި ގްލޯބަލް ފަންޑްގެ ފައިޓް އެއިޑްސް، ޓީބީ އެންޑް މެލޭރިއާގެ އެގްޒެކެޓިވް ޑައިރެކްޓަރު ޑރ. މާކް ޑައިބުލް އާއި އެކު އެކަމާއި ބެހޭ މަޝްވަރާ ބައްދަލުވުންތައް މިއަދާއި މާދަމާ ކުރިއަށް ގެންދާނެ ކަމަށް އެމިނިސްޓްރީން ނެރުނު ބަޔާނެއްގައި ވެއެވެ.
އެ މަޝްވަރާގެ ބައްދަލުވުންތަކުގައި ރާއްޖޭގެ ހެލްތު މިނިސްޓްރީން ތައްޔާރު ކޮށްފައިވާ ޓީބީ ޕްރޮގްރާމް ރިވިއު ކުރުމުގެ އިތުރުން ރާއްޖޭގައި މަސައްކަތް ކުރާ ބިދޭސީންގެ ތެރޭގައި ޓީބީ ފެތުރޭ މިންވަރު ދެނެގަތުމާއި ބެހޭގޮތުންވެސް މަޝްވަރާ ކުރެވޭނެ ކަމަށް މަޢުލޫމާތު ލިބެއެވެ.
ހެލްތު މިނިސްޓްރީން ބުނާ ގޮތުގައި ރާއްޖޭގައި މަސައްކަތް ކުރާ މަދަނީ ޖަމިއްޔާތަކުގެ އިތުރުން ކަމާއިގުޅޭ އެހެނިހެން އިދާރާތަކާއި އެކުވެސް އެބޭފުޅުން މަޝްވަރާ ކުރައްވާނެ އެވެ.
މީސެލްސް އާއި ރުބެއްލާ ރާއްޖެއިން މުޅިން އެއްކޮށް ނައްތާލުމަށްޓަކައި ހެލްތު މިނިސްޓްރީން ވަނީ ދާދިފަހުން އެމްއާރް ވެކްސިން ޖެހުމުގެ ޤައުމީ ކެމްޕެއިނެއް ފަށާފައެވެ. އެހެންނަމަވެސް މިހާރު ހަލުވިކަމާއި އެކު ރާއްޖޭގައި ފެތުރެމުންދާ ސްވައިން ފްލޫ ނުވަތަ އެޗް1އެން1 ވައިރަސްގެ ސަބަބުން އެ ކެމްޕެއިން ވަނީ މެދުކަނޑާލައިފައެވެ.