އިއްޔެ އައްޑޫ ސިޓީގެ މަރަދޫ ލިންކް ރޯޑުގައި ހިނގި ނުރައްކާތެރި އެކްސިޑެންޓުގައި ބޮލަށް ސީރިއަސް އަނިޔާތަކެއް ލިބުނު ސ.ހިތަދޫ ސޮޑާގެ މުހައްމަދު އަޒީމް، 29، އަނިޔާތަކަށް ފަރުވާކުރަމުންދަނިކޮށް ރޭގެ ދަންވަރުގެ ވަގުތެއްގައި ނިޔާވެއްޖެއެވެ.
އެކްސިޑެންޓުގައި ބޮލާއި ނާށިގަނޑަށް އަނިޔާވެ އަޒީމް އޮތީ ހިތަދޫ ރީޖަނަލް ހޮސްޕިޓަލުގެ އައިސީޔޫގައި ފަރުވާދެމުންނެވެ. ހާލު ސީރިއަސްވެ އިތުރު ފަރުވާއަށް ރޭ އިރާކޮޅު އަޒީމް މާލެ ފޮނުވާފައިވާއިރު އައިޖީއެމް ހޮސްޕިޓަލުން ބުނެފައިވަނީ އެހޮސްޕިޓަލަށް ގެންދެވުނު އިރުވެސް އޭނާގެ ހާލު ކްރިޓިކަލް ކަމަށެވެ.
އަދި އަޒީމްގެ ހާލު ސީރިއަސް ކަމުން އައިޖީއެމްއެޗްގެ އެމަޖެންސީ ރޫމުގައި އޮތީ ވެންޓިލޭޓަރުގައެވެ. ފަރުވާ ކުރިއަށް ދިއުމުން ރޭގައި އައިޖީއެމްއެޗުން އަޒީމްއަށް ލިބުނު އަނިޔާގެ ތަފްސީލު ހާމަކޮށްފައެއް ނުވެއެވެ.
އަޒީމް ނިޔާވެގެން ގޮސްފައިވަނީ މަރަދޫ ގޯދި ފިހާރަކައިރިން ލިންކް ރޯޑުގައި ތާރުގަނޑު ކަނޑައި، ރަނގަޅަށް އެތަން ހެޔޮ ނުކޮށް ހުއްޓާ ބާރު ސްޕީޑުގައި ދުއްވާފައިގޮސް އެތާ ހުރި ވަޅުގަނޑަށް އަރައި ސައިކަލު ކޮންޓްރޯލް ނުވެ ހިނގި އެކްސިޑެންޓުގައެވެ.
އައްޑޫ ސިޓީގެ ތާރުއެޅި މަގުތަކުގައި ނުރައްކާތެރި އެތައް އެކްސިޑެންޓެއް ހިނގައި އައްޑޫގެ އެތައް ލޮބުވެތި ރައްޔިތުންގެ ފުރާނަ ވަނީ މިދުނިޔެއާއި އަލްވަދާއު ކިޔާފައެވެ.