2016 ވަނަ އަހަރު އައްޑޫ ސިޓީގެ މޭޔަރ އަބްދުﷲ ސޯދިޤް(ސޯބެ) އެންމެ ދުވަހަކު ވެސް އޮފީހުން ޗުއްޓީ ނަންގަވާފައި ނުވާކަން އައްޑޫ ސިޓީ ކައުންސިލްގެ އަހަރީ ރިޕޯޓުން ހާމަވެއްޖެއެވެ.
އައްޑޫ ސިޓީ ކައުންސިލަށް 2016 ވަނަ އަހަރު ހާޒިރު ވާންޖެހޭ 228 ދުވަހުގެ ތެރެއިން ސޯބެ ވަނީ، 223 ދުވަހު އޮފީހަށް ނިކުންނަވާފައެވެ. ސަލާމުގެ ޗުއްޓީ އަދި އަހަރީ ޗުއްޓީ ވެސް ސޯބެ ނަންގަވާފައި ނުވާއިރު، އޭނާ އޮފީހުގެ މަސައްކަތަށް ނުނިކުންނަވާ 5 ދުވަހު ހުންނެވީ ރަސްމީ ބޭނުމެއްގައި ރަށުން ބޭރުގައެވެ.
ފޭދޫ ދާއިރާގެ ކައުންސިލަރ އަލީ ފަހުމީ އަހްމަދު ވެސް ފާއިތުވި އަހަރު ޗުއްޓީގެ ގޮތުގައި ނަންގަވާފައި ވަނީ އެންމެ 2 ދުވަހެވެ. އެބޭފުޅާ އޮފީހަށް ހާޒިރުވާންޖެހޭ 228 ދުވަހުގެ ތެރެއިން 212 ދުވަހު އޮފީހަށް ހާޒިރުވެވަޑައިގެންނެވި އިރު 14 ދުވަހު ރަސްމީ ބޭނުންތަކުގައި ރަށުން ބޭރުގައި ހޭދަކުރައްވާފައިވެއެވެ.
ހިތަދޫ ދެކުނު ދާއިރާގެ ކައުންސިލަރ މުހައްމަދު ޔަސްރިފް ވެސް ފާއިތުވި އަހަރު ޗުއްޓީގެ ގޮތުގައި ނަންގަވާފައި ވަނީ 8 ދުވަހެވެ. އޮފީހަށް ހާޒިރުވާންޖެހޭ 228 ދުވަހުގެ ތެރެއިން 197 ދުވަހު އޮފީހަށް ވަޑައިގެންނެވި އިރު، ރަސްމީ ބޭނުންތަކުގައި 23 ދުވަސް ރަށުން ބޭރުގައި ހޭދަކުރައްވާފައިވެއެވެ.
ޑެޕިއުޓީ މޭޔަރ އަބްދުﷲ ތޮއްޔިބް އޮފީހަށް ހާޒިރުވާންޖެހޭ 228 ދުވަހުގެ ތެރެއިން 202 ދުވަހު އޮފީހަށް ހާޒިރުވެވަޑައިގެންނެވި އެވެ. ޗުއްޓީގެ ގޮތުގައި 21 ދުވަސް ނެންގެވި އިރު، ރަސްމީ ބޭނުންތަކުގައި ރަށުން ބޭރުގައި 5 ދުވަސް ހޭދަކުރައްވާފައިވެއެވެ.
ހިތަދޫ މެދު ދާއިރާގެ ކައުންސިލަރ ހުސައިން ހިލްމީ 2016 ވަނަ އަހަރު ރަސްމީ ބޭނުންތަކުގައި 42 ދުވަސް ރަށުން ބޭރުގައި ހޭދަކުރައްވާފައި ވާއިރު އޮފީހަށް ހާޒިރުވެފައިވަނީ 137 ދުވަހުއެވެ. 48 ދުވަހު ޗުއްޓީ ނަންގަވާފައިވާއިރު، ވަކި ސަބަބެއް ނާންގައި އޮފީހަށް 1 ދުވަހު ހާޒިރު ނުވާކަން ފާހަގަކޮށްލެވެއެވެ.
އޮފީހަށް ހާޒިރުވާންޖެހޭ 228 ދުވަހުގެ ތެރެއިން ހުޅުމީދޫ ދާއިރާގެ ކައުންސިލަރ އަލީ މުހައްމަދު އޮފީހަށް ވަޑައިގެންނެވީ 150 ދުވަހުއެވެ.
ވަކި ސަބަބެއް ނާންގައި ހުޅުމީދޫ ދާއިރާގެ ކައުންސިލަރ އަލީ މުހައްމަދު 20 ދުވަހު އޮފީހަށް ހާޒިރުވެފައި ނުވާއިރު، މުސާރަ ނުލިބޭ ގޮތަށް 3 ދުވަހުގެ ޗުއްޓީއެއް އަދި އެހެނިހެން ޗުއްޓީގެ ގޮތުގައި އެއް ދުވަސް ނަންގަވާފައިވެއެވެ. އަހަރީ ޗުއްޓީގެ ގޮތުގައި 36 ދުވަސް ނެންގެވި އިރު ރަސްމީ ބޭނުންތަކަށް ރަށުން ބޭރުގައި އަލީ މުހައްމަދު ހޭދަކުރައްވާފައި ވަނީ 9 ދުވަހެވެ.