އައްޑޫގައި ފާއިތުވެ ދިޔަ 24 ގަޑިއިރުގެ ތެރޭގައި ނުރައްކާތެރި ގިނަ އެކްސިޑެންޓްތައް ހިނގައި ޒުވާނަކު މަރުވުމާ ގުޅިގެން އައްޑޫ ސިޓީ ކައުންސިލުން ކަންބޮޑުވުން ފާޅުކޮށްފި އެވެ.
ކައުންސިލުން ނެރުނު ބަޔާނެއްގައި ބުނީ ނުރައްކާތެރި އެކްސިޑެންޓްތައް ހިނގައި މިސްމީހުންގެ ފުރާނަ ގެއްލެން މެދުވެރިވާ ސަބަބުތައް ހޯދައި އެކަމަށް ރައްކާތެރި ފިޔަވަޅު އެޅުމަކީ، ކަމާ ބެހޭ އެންމެންގެ މަސްއޫލިއްޔަތެއް ކަމަށެވެ.
ޚާއްސަކޮށް އެކްސިޑެންޓްތައް ހިނގަން މެދުވެރިވާ ސަބަބު ހޯދައި ރައްކާތެރި ފިޔަވަޅު އެޅުމަށް ސަރުކާރުގެ ކަމާ ބެހޭ ފަރާތްތަކުން ވަރަށް ބޮޑަށް ސަމާލުކަން ދޭން ޖެހޭ ކަމަށް ކައުންސިލުން ބުންޏެވެ.
"އައްޑޫގައި ބުރާސްފަތި ދުވަހު ނުރައްކާތެރި އެކްސިޑެންޓް ހިނގައި ޒުވާނެއްގެ ފުރާނަ ގެއްލެން މެދުވެރިވި ސަބަބަކީ، މަގުތައް ބަލަހައްޓާ ފަރާތުގެ އިހުމާލުން މެދުވެރވި އެކްސިޑެންޓެއް ކަމަށްވުން އެކަށީގެންވެ އެވެ. މި އެކްސިޑެންޓް ހިނގީ މަގުގައި ކޭބަލެއް ވަޅުލަން ވެގެން ތާރުގަނޑު ކަނޑައި، ރަނގަޅަށް ފަސްއަޅާ އެއްވަރުނުކޮށް އޮތުމުގެ ސަބަބުން ކަމަށް ވެދާނެއެވެ. މަންޒަރުދުށް މީހުން ބުނަނީ ދުއްވާފައި ދިޔަ ސައިކަލް ކޭބަލް ވަޅުލަން ކޮނުނު ވަޅުގަނޑަށް އެރުމުން ކަހާލައިގެން ވެއްޓުނީ ކަމަށެވެ." ބަޔާނުގައިވެ އެވެެ.
ކައުންސިލުން ބުނީ މަގުތައް ބަލަހައްޓާ ފަރާތުން މަގުގެ ސަލަމާތާއި ރައްކާތެރި ކަމަށް އަޅަންޖެހޭ ފިޔަވަޅުތައް ނާޅައި އޮތުމުގެ ސަބަބުން އައްޑޫގައި ބޮޑެތި އެކްސިޑެންޓްތައް ހިނގަމުން ދިއުމަކީ އައްޑޫސިޓީ ކައުންސިލުން އަބަދުވެސް ވަރަށް ކަންބޮޑުވާ ކަމެއް ކަމަށެވެ.
"ރަނގަޅު ފެންވަރަކަށް ހަދާފައިވާ ލިންކްރޯޑު ހަލާކުވެ ބޮޑެތި ބާގަނޑުތައް ހެދިފައި އޮންނައިރު އެކަންކަން ރަނގަޅު ނުކުރެވެއެވެ. ލިންކް ރޯޑުގައި ބޮޑެތި ވަޅުގަނޑުތައް ހުރުމުން އޭގެ ނުރައްކަލަށް މަގުން ދަތުރުކުރާ އެންމެން މިވަނީ ހުށަހެޅިފައެވެ. ބާރު ސްޕީޑްގައި ދުއްވާ މީހާ އަށާއި ގަވާއިދާއި އެއްގޮތަށް ދުއްވާ މީހާ ވެސް މެއެވެ." ބަޔާނުގައިވެ އެވެ.
ކައުންސިލުން އަދި ބުނީ މިފަދަ ނުރައްކާތެރި ގިނަ ހާދިސާތައް ކުރިމަތި ވަނީ މަގުތައް ގަވާއިދުން މަރާމާތުކޮށް ނުބެލެހެއްޓޭތީ ކަމަށެވެ.
"ލާމަރުކަޒީ ގާނޫނަށް ގެނެވުނު އިސްލާހާއި ގުޅިގެން 2015 ވަނަ އަހަރުން ފެށިގެން އައްޑޫސިޓީގެ މަގުތައް ބެލެހެއްޓުން ވަނީ މިނިސްޓްރީ އޮފް ހައުސިންގ އާއި ހަވާލުކުރެވިފައެވެ. އެހެން ނަމަވެސް ލިންކް ރޯޑް އެކަށީގެންވާ ގޮތަކަށް މަރާމާތު ނުކުރެވޭކަން ފާހަގަކުރެވެއެވެ. އަދި ހަމައެހެންމެ މަގުމަތީގައި ކުރެވޭ މަސައްކަތްތަކަށާއި މަގުކޮނުމުގެ މަސައްކަތްތަކަށް ހުއްދަ ދިނުމަކީވެސް އެމިނިސްޓްރީން ކުރައްވާ މަސައްކަތެކެވެ. އެހެންނަމަވެސް މަގުގައި ކުރަންޖެހޭ މަސައްކަތްތައް ކުރުމަށް ގަވާއިދުން ހުއްދަދީ ސުޕަވައިޒްކޮށް ނުބެލެހެއްޓޭކަންވެސް ފާހަގަކުރެވެއެވެ." ބަޔާނުގައިވެ އެވެ. "މިފަދަ ހިތާމަވެރި އެކްސިޑެންޓްތައް މަދުކުރުމަށް ދުއްވާ ފަރާތްތަކުން ސަމާލުވާން ޖެހޭ ކަންކަމަށް ސަމާލުވުމަށާއި މަގުތައް ރަނގަޅަށް ބެލެހެއްޓުމަށް ކަމާއިބެހޭ ފަރާތްތަކަށް އިލްތިމާސްކުރަމެވެ. އަދި މަގުގައި ހަލާކުވެފައިވާ ތަންތަން ރައްޔިތުންގެ ސަލާމަތާއި ރައްކާތެރިކަމަށްޓަކައި ރަނގަޅުކޮށްދެއްވުމަށް ހައުސިންގެ މިނިސްޓްރީ އަށް އިލްތިމާސްކުރަމެވެ."