ދިވެހި ރާއްޖޭގެ އެންމެ ފުރަތަމަ ފަސް ތަރީގެ ރިސޯޓް ކަމަށްވާ ނިކަ އައިލެންޑް ރިސޯޓް އެންޑް ސްޕާ ގެ ވެރިޔާ ޖެމްޕިއެރޯ ބެލާޒީ ނިޔާވެއްޖެ އެވެ.
އުމުރުން 88 އަހަރުގައި، މުސްކުޅި ބައްޔަށް އޭޑީކޭ ހޮސްޕިޓަލުގެ އައިސީޔޫ ގައި ފަރުވާ ދެމުން ދަނިކޮށް ބެލާޒީ ނިޔާވެފައި ވަނީ މިދިޔަ އާދިއްތަ ދުވަހު އެވެ.
ބެލާޒީ ރާއްޖޭގައި ހިންގަނީ ނިކަ ރިސޯޓް އެކަންޏެވެ. އެ ރިސޯޓްގެ ޖެނެރަލް މެނޭޖަރު އަބްދުއްރައްޒާޤް އަލީ އާއި ހަވާލާދީ ސަން އޮންލައިން އިން ރިޕޯޓް ކުރާ ގޮތުގައި ބެލާޒީ ހަށިގަނޑު ވަނީ މިއަދު އިޓަލީ އަށް ފޮނުވާލާފަ އެވެ.
ރައްޒާޤް ވިދާޅުވާ ގޮތުގައި ވިޔަފާރި މާބޮޑަށް ފުޅާ ކުރުމުގެ ވިސްނުމެއް ބެލާޒީ ނުގެންގުޅޭ ކަމަށާއި، ބެލާޒީ ދެކުނީ އެ ރިސޯޓަކީ އޭނާގެ ގެއެއް ގޮތުގައި ކަމަށެވެ. އަދި ފަހުން ފަހުން އޭނާ ތިން މަހުން އެއްމަހު ރާއްޖެ އަށް އައިސް އުޅޭ ކަމަށްވެސް ރައްޒާޤް ވިދާޅުވިއެވެ.
ބެލާޒީ ނިޔާވިއިރު، އޭނާގެ އަންހެނުން ވެސް ވަނީ މިދިޔަ ޑިސެމްބަރު މަހު ނިޔާވެފަ އެވެ. މިހާރު ނިކަ ރިސޯޓް ހިންގަނީ ބެލާޒީގެ ދެ ދަރިންނެވެ.
1977 ހިސާބުގައި އެންމެ ފުރަތަމަ ރާއްޖެ އަށް އައި ބެލާޒީ ނިކަ ރިސޯޓް ހުޅުވާފައި ވަނީ 1980 ވަނަ އަހަރު އެވެ. އެ ރިސޯޓް އެންމެ ފުރަތަމަ ހުޅުވީ 'ނިކަ ހޮޓެލް' ގެ ނަމުގައި ކަމަށް ވިޔަސް، ފަހުން ބެލާޒީ ވަނީ އެ ރިސޯޓް ފަސް ތަރީގެ ރިސޯޓަކަށް ބަދަލުކޮށްފައެވެ.
ރާއްޖޭގައި ރިސޯޓެއް ހިންގަން ފެށި އިޓަލީގެ ފުރަތަމަ އިންވެސްޓަރަކީ ބެލާޒީ ކަމުގައި ވީއިރު، ނިކަ ރިސޯޓަކީ ރާއްޖޭގައި ހުޅުވި އެންމެ ފުރަތަމަ ފަސް ތަރީގެ ރިސޯޓެވެ.