ރާއްޖޭގައި ފެތުރެމުންދާ ސްވައިން ފްލޫއަށް އިތުރު 14 މީހަކު މިއަދު ޕޮސިޓިވް ވެފައިވާ ކަމަށް ހެލްތް ޕްރޮޓެކްޝަން އޭޖެންސީއިން ނެރުނު ތަފާސް ހިސާބުތަކުން ދައްކައިފިއެވެ.
ކޮންމެ ދުވަހަކު އެޗްޕީއޭ އިން ނެރެމުން އަންނަ މި ތަފާސް ހިސާބުތަކުން މިހާރު 169 މީހަކު ރާއްޖެއިން މިބައްޔަށް ޕޮސިޓީވް ވެފައިވާ ކަމަށް ދައްކައެވެ.
އަދި 33 މީހަކު އެޑްމިޓް ކޮށް، ފަރުވާ ދެމުންދާ ކަމަށްވެސް އެޗްޕީއޭ އިން މައުލޫމާތު ދީފައިވެއެވެ. ސްވައިން ފްލޫ ޖެހިގެން މިހާތަނަށް ތިން މީހަކު ނިޔާވެފައިވާއިރު ބައްޔަށް ޕޮސިޓިވް ވި މާބަނޑު އަންހެނަކު ވަނީ ހާލު ސީރިއަސްވެ އެމަޖެންސީކޮށް ސިޒޭރިއަން ހަދައި ދަރިފުޅު ނަގާފައެވެ.
އައިޖީއެމްއެޗުން ބުނެފައިވަނީ އަދިވެސް ދެމައިންގެ ހާލުވެސް ސީރިއަސް ކަމަށެވެ. ސްވައިން ފްލޫ ފެތުރެމުންދާތީ ރާއްޖޭގެ ސްކޫލްތައް ބަންދުކޮށް، ބައެއް މުވައްސަސާތަކާއި ސިވިލް ސާވިސްގެ މާބަނޑު މުވައްޒިފުންނަށް ވަނީ ރިސްކު ހައިވުމާއެކު ޗުއްޓީ ދީފައެވެ.