އައްޑޫގެ ނަރުދަމާ ނިޒާމްގެ މަސައްކަތް ފެށުމުގެ ތައްޔާރީތައް ވާން ފަށައިފި އެވެ.
އެގޮތުން މަރަދޫ، މަރަދޫފޭދޫ އަދި ފޭދޫގެ ނަރުދަމާގެ މަސައްކަތް ފެށުމުގެ ބޭނުންވާ ސާމާނު މިހާރު ވަނީ އައްޑު އަށް ގެންނަން ފަށަފަ އެވެ. މި ތިން ރަށުގެ ނަރުދަމާ ގާއިމު ކުރަން ހަވާލުކޮށްފައި ވަނީ އެމްޓީސީސީއާ އެވެ.
މި މަޝްރޫއުގެ ދަށުން 38 ކިލޯ މީޓަރުގެ ދިގުމިނުގެ ނަރުދަމާ ވިއުގައެއް ޤާއިމްކޮށް، 3387 ޓަނުގެ ސްވެރޭޖް ޓްރީޓްމަންޓް ޕްލާންޓެއް ވެސް ބަހައްޓާނެ އެވެ.
އޮޕެކް ފަންޑް ފޯރ ޑިވެލޮޕްމެންޓް، އޮފިޑްގެ ލޯން އެހީއާ ޕީއެސްއައިޕީ ބަޖެޓުން ޚަރަދުކޮށްގެން ކުރިއަށް ގެންދާ މި މަޝްރޫއުގެ އަގު ގާތްގަނޑަކަށް 130 މިލިއަން ރުފިޔާއަށް އަރަ އެވެ. މި 15 މަސް ދުވަހުގެ ތެރޭގައި ނިންމަން ޖެހެ އެވެ.
ހިތަދޫގެ ނަރުދަމާގެ މަސައްކަތް ޙަވާލުކޮށްފައި ވަނީ، އެމްޑަބްލިޔުއެސްސީއާ އެވެ. މިދިޔަ އަހަރުގެ ސެޕްޓެމްބަރ މަހުގެ ތެރޭގައި ޙަވާލު ކުރި މި މަސައްކަތް 15 މަސް ދުވަހުގެ ތެރޭގައި ނިންމަން ވަނީ ހަމަޖެހިފަ އެވެ. ސަތޭކަ ނުވަ މިލިއަން ރުފިޔާ މި މަޝްރޫއަށް ޚަރަދު ކުރަނީ ދައުލަތުގެ ބަޖެޓުންނެވެ.
މީދޫ އަދި ހުޅުމީދޫގެ ނަރުދަމާ ނިޒާމް ޤާއިމްކުރެއްވުމުގެ މަސައްކަތް ޙަވާލުކޮށްފައި ވަނީ، ލަންކާގެ ސިއެރާ ކުންފުންޏާ އެވެ.
އެ މަސައްކަތް އަންނަ އަހަރުގެ ޖެނުއަރީ މަހުގެ ނިޔަލަށް ނިންމަން ޖެހެ އެވެ. އޮޕެކް ފަންޑް ފޯ ޑިވެލޮޕްމެންޓް، އޮފިޑްގެ ލޯން އެހީއާ ޕީއެސްއައިޕީ ބަޖެޓުން ޚަރަދުކުރައްވާ މި މަޝްރޫއުގެ އަގު ގާތްގަނޑަކަށް 113 މިލިއަން ރުފިޔާ އަށް އަރަ އެވެ.
މަޝްރޫއުގެ ދަށުން 31.2 ކިލޯމީޓަރުގެ ނަރުދަމާ ވިއުގައެއް ގާއިމްކޮށް، 1885 ޓަނުގެ ސުވޭޖް ޓްރީޓްމަންޓް ޕްލާންޓެއް ބަހައްޓާނެ އެވެ.
ސަރުކާރުން ބުނީ އަމާޒަކީ 2018 ވަނަ އަހަރަށް މުޅި އައްޑޫގެ ނަރުދަމާ ނިޒާމް ނިންމާލުން ކަމަށެވެ.