އައްޑޫގެ ކުނި މެނޭޖް ކުރުމުގެ ނިޒާމް ހިންގައި ބެލެހެއްޓުން ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އާ މިއަދު ހަވާލުކޮށްފި އެވެ.
މި މަސައްކަތުގެ އެއްބަސްވުމުގައި އެންވަޔަރަމަންޓް މިނިސްޓްރީގެ ފަރާތުން ސޮއި ކުރެއްވީ މިނިސްޓަރު ތޯރިގް އިބްރާހީމެވެ. ވެމްކޯގެ ފަރާތުން ސޮއި ކުރެއްވީ އެ ކުންފުނީގެ މެނެޖިން ޑިރެކްޓަރު އިބްރާހިމް ފުއާދެވެ.
ވެމްކޯއާ އައްޑޫގެ ކުނި މެނޭޖް ކުރުން ހަވާލު ކުރި އިރު، އެ ކުންފުނިން ވަނީ ވަޒީފާތަކަށް ބޭނުންވާ މީހުން ނަގަން އޯޕަން ޑޭއެއް ވެސް މިދިޔަ އަހަރުގެ ނޮވެމްބަރު މަހު އައްޑޫގައި ބާއްވައިފަ އެވެ.
މިނިސްޓަރު ވިދާޅުވީ އައްޑޫގެ ކުނި މެނޭޖް ކުރުމުގެ މަސައްކަތް މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިން މިހާރު ކުރަމުން ދިޔަ ނަމަވެސް އަންނަ މަހުގެ އެއް ވަނަ ދުވަހުން ފެށިގެން އައްޑޫގެ ހުރިހާ އަވަށެއްގެ ކުނި މެނޭޖް ކުރުމުގެ ކަންކަން ހިންގައި ބަލަހައްޓަމުން ގެންދާނީ ވެމްކޯ އިން ކަމަށެވެ.
ތޯރިގް އަދި ވިދާޅުވީ އަންނަ މަހުގެ އެއްވަނަ ދުވަހުން ފެށިގެން ގޭގެއިން ގެންނަ ކުނިތައް ނެގުމާއި، ވިޔަފާރިތަކުން ގެންނަ ކުނިތައް ބަލައިގަނެ މި ވަގުތު އައްޑޫ ސިޓީގައި ގާއިމު ކުރެވިފައި ހުރި ވޭސްޓް މެނޭޖްމަންޓް ސެންޓާ ބަލަހައްޓައި އެތަނުގެ މަސައްކަތްތައް ވެސް ބަލަހައްޓާނީ ވެމްކޯ އިން ކަމަށެވެ.
އެމްއާރްޑީސީން މިހާރު މި މަސައްކަތް ކުރި ނަމަވެސް، އެކަށީގެންވާ ގޮތަކަށް މަސައްކަތް ކުރިއަށް ނުގެންދެވޭތީ، ގިނަ ބައެއްގެ ޝަކުވާތައް ބޮޑެވެ.
އެ ކުންފުންޏާ އައްޑޫގެ ކުނި މެނޭޖް ކުރުން ވަގުތީ ގޮތުން ހަވާލު ކުރީ މެއި 17، 2016 ގަ އެވެ.