ބޮލީވުޑްގެ ފަންނާނުންގެ އޮޓޮބައޮގްރަފީތަކީ ފޭނުން އަބަދު ވެސް ވަރަށް ޝައުގުވެރިކަން ދޭ އެއްޗެކެވެ. މި ފަހަކަށް އައިސް ބައެއް އެކްޓަރުންނާއި ޑައިރެކްޓަރުން އަންނަނީ އެ މީހުންގެ ބައޮގްރަފީތައް ނެރެމުންނެވެ.
އެކަމާ ބެހޭ ގޮތުން މަޝްހޫރު އެކްޓަރު ރިތިކް ރޯޝަން ވެސް ބުނީ އޭނާގެ ހަޔާތާ ބެހޭ ގޮތުން ފޮތެއް ލިޔުމުގެ ޝައުގުވެރިކަން އެބަހުރި ކަމަށެވެ.
އެކަމަކު އޭނާއަކީ ލިޔުންތެރިއަކަށް ނުވާތީ، އެކަމާ ދޭތެރޭ އަދިވެސް ވިސްނަމުން އަންނަ ކަމަށް "ކަހޯ ނާ ޕިޔާރް ހޭ" އިން ބޮލީވުޑަށް ނިކުތް އެކްޓަރު ބުންޏެވެ.
"ފޮތެއް ލިޔުމާ ބެހޭ ގޮތުން އަހަރެން ވިސްނާފައި އެބަ އޮތް. އެކަމަކު އަދިވެސް އެކަމާ ދޭތެރޭ ސީރިއަސްކޮށް ވިސްނަމުން މި އަންނަނީ." ދެ ކުދިން ލިބުނު ފަހުން 13 އަހަރުވީ ކައިވެނި ރޫޅިފައިވާ ބަތަލު ބުންޏެވެ.
ކާމިޔާބު އެތައް ފިލްމެއް ކުޅެފައިވާ ރިތިކް ފިލްމެއް ޑައިރެކްޓްކޮށްފާނެތޯ އެހުމުން އޭނާ ބުނީ އެކަމާ އަދި ނުވިސްނާ ކަމަށެވެ. އަދި ބައްޕަ ރާކޭޝް ރޯޝަން ފަދައިން ޑައިރެކްޓަރަކަށްވުމާ ދޭތެރޭ އެއްވެސް ހިޔާލެއް ނެތް ކަމަށް ދާދި ފަހުން ނިކުތް "ކާބިލް" ރިތިކް، 43، ބުންޏެވެ.