މިއަދުން ފެށިގެން އައްޑޫގެ ކުނި މެނޭޖް ކުރަން ހަވާލުކޮށްފައިވާ ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން އައްޑޫގައި ވަޒީފާގެ ފުރުސަތުތަކެއް ހުޅުވާލައިފި އެވެ.
އެ ކުންފުނިން ބުނީ ވަޒީފާތަކަށް ޝައުގުވެރިވާ މީހުންނަށް، ކުރިމަތިލުމުގެ ފުރުސަތު މި މަހުގެ 4 ވަނަ ދުވަހާ ހަމައަށް ހުޅުވާލައިފައިވާ ކަމަށެވެ.
މުވައްޒަފުން ހޯދާ ވަޒީފާތަކުގެ ތެރޭގައި ޑްރައިވަރުންނާއި ކަލެކްޝަން ސާވިސް އޮފިސަރުންގެ އިތުރުން ލޭބަރުން ހިމެނެ އެވެ.
މިވަޒީފާތަކަށް އެދޭ ފޯމް ވެމްކޯގެ ވެބްސައިޓުން ޑައުންލޯޑް ކުރެވޭނެ އެވެ.
އެ ކުންފުނިން މިދިޔަ އަހަރުގެ ނޮވެމްބަރު މަހުގެ ތެރޭގައި ވަނީ ވަޒީފާގެ ފުރުސަތުތަކާ ބެހޭ ގޮތުން މައުލޫމާތު ދޭން އައްޑޫގައި އޯޕަން ޑޭއެއް ބާއްވައިފަ އެވެ.
ވެމްކޯ އިން ކުނި މެނޭޖް ކުރުމާ ހަވާލުވުމާ ގުޅިގެން، ކުނި އުފުލަން އެ ކުންފުނިން ވަނީ އައްޑު އަށް ޒަމާނީ ދެ ވެހިކަލެއް ވެސް ގެނެސްފަ އެވެ.
އައްޑޫގެ ކުނި މީގެ ކުރިން މެނޭޖް ކުރަމުން އައީ މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) އިންނެވެ.